Մեր ղեկավարներին ձեռնտու է, որ երկրում լինեն աղանդավորներ. Ալեքսանդր Ամարյան

Քայքայիչ պաշտամունքներից տուժածների օգնության և վերականգնողական կենտրոնի ղեկավար Ալեքսանդր Ամարյանը և հոգեթերապևտ, նարեկաբույժ Արմեն Ներսիսյանն այսօր լրագրողների հետ հանդիպման ընթացքում անդրադարձան վերջին շրջանում հաճախակի դարձած ինքնասպանություններին ու սպանություններին՝ աղանդավորության ֆոնին:

Ըստ Արմեն Ներսիսյանի` Հայաստանում շատացել են այն դեպքերը, երբ մարդիկ հավատի քողի ներքո բիզնեսներ են ծավալում: Նա նշեց, որ այս պարագայում պետք է ուշադրություն դարձնել ճիշտ մեկնության վրա:

«Եհովայի վկաները, «Կյանքի խոսք»-ին և Ավետարանչական եկեղեցու դավանողները Հայաստանում տարածում գտած աղանդավորներն են: Շատ կարևոր է նրանց զոմբիացումից դուրս հանելը: Մարդիկ հայտնվում են դեպրեսիայի մեջ: Օրինակ` Ավետարանչական եկեղեցու դավանորդները երբեմն հայտնվում են այնպիսի վիճակում, որ կարծում են` շեղվել են ճշմարիտ ուղուց և հայտնվում են դեպրեսիայի մեջ, ինչը կարող է հանգեցնել ինքնասպանության կամ էլ ցանկացած այլ` կյանքին սպառնացող գործողության»,- ասաց Ներսիսյանը:

Ալեքսանդր Ամարյանը նշեց, որ աղանդները բաժանվում են երկու տիպի` պարզապես աղանդներ և քայքայիչ աղանդներ: Նրա բնորոշմամբ` Հայ Առաքելական եկեղեցու հավատքից մի փոքր շեղումն արդեն իսկ համարվում է աղանդ, սակայն դա քայքայիչ չէ, իսկ արդեն Եհովայի վկաները և «Կյանքի խոսք»-ին դավանողները քայքայիչ աղանդավորների տեսակներ են:

Ալեքսանդր Ամարյանն  առանձնակի շեշտեց այն հանգամանքը, որ մեր երկրում տեղեկատվության պակաս կա և դրա արդյունքում ավելի է հեշտանում քայքայիչ աղանդների տարածումը:

«Մեր դպրոցականներին, թինեյջերական տարիքի երեխաներին ծնողներն ամռանն ուղարկում են տարբեր ճամբարներ` առանց գիտակցելու` ինչ վտանգներ կարող է պարունակել այդ ամենը: Հայաստանյան պետական ճամբարներից միայն երկու-երեքը կարող եմ առանձնացնել, որոնք  չեն զբաղվում աղանդների տարածմամբ, իսկ մնացածը քայքայիչ աղանդների հողի վրա են: Երեխաներին հավաքում են մեկ տեղում և ակտիվ քարոզչություն անում»,- ասաց Ամարյանը:

Նա անդրադարձավ նաև աղանդավորական հողի վրա կատարվող սպանություններին: «Մենք չունենք կրոնական շարժառիթներով սպանությունների  վերաբերյալ մասնագետներ, դա մեծագույն խնդիր է: Օրինակ` վերջին շրջանում հաճախակի են դարձել տարբեր տեսակի սպանությունները, որոնք կրոնական հողի վրա են կատարվում: Սևանի հայտնի դեպքը, երբ երիտասարդը կացինով սպանեց իր ծնողներին, այս վերջին դեպքը, երբ ամուսինը սպանեց իր նոր ծննդաբերած կնոջը, և այլ նմանատիպ սպանությունների հիմքում կան աղանդավորական շարժառիթներ»,- ասաց Ամարյանը` հավելելով` մենք չունենք համապատասխան մասնագետներ, ովքեր կարող են աշխատել զոմբիացման ճանապարհին գտնվող մարդկանց հետ:

Նա  անդրադարձավ նաև մեր պետական համակարգի` այս ամենի նկատմամբ ցուցաբերած անտարբերությանը: Ամարյանի կարծիքով` գուցե մեր ղեկավարներին ձեռնտու է, որ երկրում լինեն աղանդավորներ, քանի որ նրանց կառավարելն ավելի հեշտ է, հնարավոր է նաև` մեր ղեկավարների մեջ էլ լինեն աղանդավորներ: