Պատգամավորի կողմից ճանապարհային ոստիկանին հայհոյելու համար ոստիկանությունը դատարան չի դիմի

ԲՀԿ խմբակցության պատգամավոր Հրանտ Դավթյանի կողմից ճանապարհային ոստիկանին հայհոյելու համար ոստիկանությունը չի դիմի դատարան: Այս մասին yerkir.am-ին հայտնեց ՀՀ ոստիկանության հասարակայնության հետ կապերի և լրատվության բաժնի պետ Աշոտ Ահարոնյանը:

Նա հայտնեց, որ ոստիկանությունը ծանոթ է տեսանյութին, ուսումնասիրել է այն, սակայն դատարան չի դիմելու, քանի որ պատգամավորի արտահայտությունները հրապարակային բնույթ չեն կրել: «Անձի պատիվն ու արժանապատվությունը,  գործարար կամ բարի համբավը ենթակա են պաշտպանության միայն այլ անձի կողմից  հրապարակայնորեն արված` վիրավորանք պարունակող արտահայտունների դեպքերում, դա է պատճառը, որ ոստիկանությունը չի կարող օգտվել քաղաքացական օրենսգրքի համապատասխան հոդվածից»,- yerkir.am-ին հայտնեց Ահարոնյանը՝ նշելով, որ հակառակ դեպքում, բնականաբար, կդիմեին:

Հիշեցնենք, որ պատգամավորի խայտառակ պահվածքի մասին վկայող տեսանյութը բուռն քննարկման առարկա էր դարձել: Գաղտնի կերպով արված տեսանյութում լսվում է, թե ինչպես է պատգամավորը հայհոյում ճանապարհային ոստիկանին իր մեքենան կանգնեցնելու ու իրեն տուգանելու համար և հրաժարվում ստորագրել ճանապարհատրանսպորտային խախտման վերաբերյալ ակտը:

Անդրադառնալով այն տեղեկությանը, թե միջադեպից հետո ոստիկանապետն անձամբ է «զրուցել» պատգամավորի հետ, Ահարոնյանն ասաց, որ դա անհեթեթություն է:

Ի դեպ, արդեն մի քանի օր է` փորձում ենք կատարվածի վերաբերյալ մեկնաբանություն ստանալ պատգամավորից, սակայն նա, պատասխանելով հեռախոսազանգերին, հայտարարում է` պատգամավորը տեղում չէ: