2017-ից աշխատանքային գրքույկները դուրս կգան գործածությունից

2017-ից աշխատանքային գրքույկները դուրս կգան գործածությունից. այսօր լրագրողներին հայտնեց Հայաստանի գործատուների միության նախագահ Գագիկ Մակարյանը:

Նա նշեց, որ նման քայլը միայն դրական կարելի է համարել, որովհետև այդ կերպ վերանում ` ավելորդ թղթաբանությունը: «Վաղուց արդեն ձևավորվել է էլեկտրոնային բազա, որտեղ էլ առկա է ողջ ինֆորմացիան անձի մասին, ուստի գրքույկները դառնում են ձևական ու ավելորդ մի բան: Էլեկտրոնային բազայի տվյալներ ունի հարկային մարմինը, և հարկ եղած դեպքում` հենց նրանցից էլ կարող ենք ինֆորմացիա ստանալ»,- ասաց Մակարյանը:

Նա նշեց նաև, որ մինչև 2017-ը նրանք, ովքեր ունեն աշխատանքային գրքույկներ, կարող են այն կիրառել, իսկ նրանք, ովքեր չունեն, պետք էլ չէ ունենալ, քանի որ յուրաքանչյուր կազմակերպության հաշվապահներն ամեն ամիս գրանցում են նոր աշխատողներին կամ աշխատանքից ազատվածներին:

Թե ինչ է լինելու այն մարդկանց աշխատանքային գրքույկների ու աշխատանքային ստաժի հետ, որոնց տվյալները չկան էլեկտրոնային բազայում` ինչ-ինչ պատճառներով /ասենք` տվյալ կազմակերպության արխիվն այրվել կամ ոչնչացվել է/, ըստ Մակարյանի, անհրաժեշտ է դիմել աշխատանքի և սոցիալական հարցերի նախարարություն, որոնք էլ կուղղորդեն համապատասխան համայնքի հարկային բաժին:

«Հիմա գործատուն աշխատանքի է վերցնում մարդուն ոչ թե աշխատանքային գրքույկի հիման վրա, այլ գիտելիքի և փորձի, ուստի ստացվում է, որ գրքույկները կամաց-կամաց դուրս են գալիս գործածությունից, և զուտ տեղեկատվական բնույթի փաստաթուղթ դառնում: Իսկ էլեկտրոնային բազայում անձի աշխատանքային փորձի մասին ամբողջ ինֆորմացիան կա»,- ասաց Մակարյանը: