Մենք երբեք ԵՄ-ին սիրուհու պես չենք վերաբերվել. Պուտին

Արդեն հայտնել ենք, որ ՌԴ նախագահ Վլադիմիր Պուտինը Իտալիա այցին ընդառաջ հարցազրույց է տվել իտալական Il Corriere della Sera-ին: Մի շարք այլ հարցերի հետ մեկտեղ անդրադարձել է նաև ՌԴ-ԵՄ հարաբերություններին: 

Հարցազրույցից հատվածը՝ ստորև:

-Վլադիմիր Վլադիմիրովիչ, Դուք ասացիք, որ ԵՄ-ի հետ հարաբերությունների վրա ընկած ստվերը ձեր ընտրությունը չէր, և տպավորություն է, որ ՌԴ-ն իրեն դավաճանված է զգում Եվրոպայի կողմից, ինչպես սիրուհին է լքում սիրեկանին: Ի՞նչն այնպես չէ այդ  հարաբերություններում: Կարծում եք՝ ԵՄ-ը շա՞տ էր կախված ԱՄՆ-ից ուկրաինական ճգնաժամի հարցում:

- Նախ` սիրուհու մասին: Եթե դուք նման հարաբերություններ ունեք կնոջ հետ, այսինքն` չեք վերցնում ձեզ վրա ոչ մի պարտականություն, ապա իրավունք չունեք նաև իրենից որևէ պարտականություն պահանջել: Մենք երբեք չենք վերաբերվել Եվրոպային` որպես սիրուհու: Մենք միշտ լուրջ հարաբերություններ ենք առաջարկել: Իսկ ես այժմ այնպիսի տպավորություն ունեմ, որ հենց Եվրոպան է ձգտել մեզ հետ հարաբերություններ կառուցել նյութական հիմքի վրա, ընդ որում՝ բացառապես հօգուտ իրեն:Երբ եվրոպական երկրներն են ինտեգրվում, դա նորմալ է, բայց երբ մենք հետխորհրդային տարածքում նույնն ենք անում, ապա դա նշանակում է, որ կայսրություն ենք ցանկանում ստեղծել: Ինչո՞ւ է նման մոտեցում, չեմ հասկանում: