Գազալցակայաններում գրանցված պայթյունները մարդկանց շեղելու միջո՞ց էին

Տնտեսագետ Վարդան Բոստանջյանն այսօր լրագրողների հետ զրուցեց էլեկտրաէներգիայի սակագնի բարձրացման, ՀԷՑ-ի ծավալած գործունեության, ինչպես նաև գազալցակայաններում տիրող իրավիճակի մասին: Նրա կարծիքով` որևէ բան պատահական տեղի չի ունենում:

«Գազալցակայաններում գրանցված պայթյունների և դրանց շուրջ ծավալվող խոսակցությունների գերնպատակը հետևյալն է` Հայաստանում մնացած մարդկանց ուշադրությունը շեղել կառավարման համակարգից և ստիպել, որ ուրիշ բաների մասին մտածեն»,- նշեց Բոստանջյանը:

Ըստ նրա` արդեն վաղուց կանխատեսելի էր այն, որ գազաբալոնները պայթյունավտանգ են:

Անդրադառնալով էլեկտրաէներգիայի սակագնի բարձրացմանը` Բոստանջյանը նշեց. «ՀԷՑ-ի դեմ քրեական գործ հարուցելը կամ նրան սնանկ հայտարարելը հարցի լուծումներ չեն: Էներգահամակարգերը խեղճ, տարաբախտ վիճակում են: Մենք այլընտրանք չունենք, քան արդիականացնել այդ համակարգը, պատասխանատվության ասպեկտներ սահմանել: Այլապես` 250-300 միլիոն գումար հօդս է ցնդելու այս ոլորտում: Իրավիճակից ելք ես տեսնում եմ գոտիները ձգելը»:

Ըստ նրա` հոսանքի թանկացումն անխուսափելի է, սակայն, գործընթացը պետք է անցնցում կազմակերպել: «ՀԷՑ-ի ազգայնացումն ամենաճիշտ որոշումներից մեկը կլիներ: Վերահսկողության ու պատժամիջոցների կիրառումը ևս վատ միջոց չէ: Ես մտածում եմ, որ եթե Ռոբերտ Նազարյանը հնարավոր թանկացման բոլոր պատճառները թվեր, կհոգներ»,- նշեց Բոստանջյանը: