ԱՄՆ-ի պաշտպանության նախարարը դատապարտել է Ստամբուլի պայթյունները

ԱՄՆ-ի պաշտպանության նախարար Էշթոն Քարթերը  դատապարտել է դեկտեմբերի 10-ի երեկոյան Ստամբուլում տեղի ունեցած պայթյունները: Ըստ թուրքական Yenisafak թերթի` նա գրավոր հայտարարություն է արել, որում, մասնավորապես, նշվում է, որ այդ ահաբեկչական հարձակումը միայն ավելի է ամրապնդելու ԱՄՆ-ի և նրա դաշնակից Թուրքիայի համերաշխությունը նման երևույթների դեմ պայքարում:

Ըստ Ermenihaber-ի՝ Քարթերը նաև շեշտել է, որ ԱՄՆ-ը Թուրքիայի հետ թե' ՆԱՏՕ-ի շրջանակներում, թե' «Իսլամական պետություն» (ԻՊ) ահաբեկչական կազմակերպության դեմ գործող դաշնակցային ուժերի կազմում շարունակելու է սերտ աշխատանքները:

Թուրքական աղբյուրը հիշեցնում է, որ ավելի վաղ Սպիտակ տան Ազգային անվտանգության խորհրդի խոսնակ Նեդ Փրայսը ևս խստորեն դատապարտել էր  Ստամբուլի Բեշիքթաշում գտնվող Vodafone Arena մարզադաշտի հարակից տարածքում իրականացված պայթյունները: