Թուրքիայում ընդդիմադիր կուսակցությունը հանդիպում է կազմակերպել հայ համայնքի ներկայացուցիչների հետ

Թուրքիայում ընդդիմադիր Ժողովրդա-հանրապետական կուսակցության ներկայացուցիչներ Սեզգին Թանրըքուլուն, Շաֆաք Փավեյը, Էնիս Բերբերօղլուն, նույն կուսակցությունից պատգամավորի հայ թեկնածու Սելինա Օզուզուն Դողանը նախընտրական շրջանում հանդիպել ու նախաճաշել են Թուրքիայի հայ, հույն և ասորի փոքրամասնությունների ներկայացուցիչների հետ:

Ըստ «Ակօս»-ի՝ հանդիպման ընթացքում քննարկվել են ազգային փոքրամասնություններին հուզող հարցերը:

«Այսուհետ իմացեք, որ Անկարայում ձեր խնդիրներին մոտիկից հետևող մարդ կա: Շնորհակալ եմ բոլոր մասնակիցներին»,- ասել է Սելինա Դողանը:

Կուսակցության փոխնախագահ Շաֆաք Փավեյը հանդիպման ընթացքում ազգային փոքրամասնություններին խոստացել է քաղաքացիական հավասար իրավունքներ:

Թուրքիայում խորհրդարանական ընտրությունները կկայանան հունիսի 7-ին: