Կառավարության ներկայացրած` ազդեցության գնահատականը տարակուսանք է առաջացնում. Արծվիկ Մինասյան

ԱԺ հերթական նիստում քննարկվում է ԲՀԿ-ական պատգամավորներ Միքայել Մելքումյանի, Նաիրա Զոհրաբյանի, Էլինար Վարդանյանի կողմից ներկայացված` «Ֆիզիկական անձանց բանկային ավանդների հատուցումը երաշխավորելու մասին» օրենքում փոփոխություններ կատարելու մասին օրինագծի հարցը, որով առաաջրկվում է, որ ոչ միայն բանկը, այլ նաև պետությունը երաշխավոր կանգնի, որ քաղաքացիների ավանդները վերադարձվեն:

ԱԺ ՀՅԴ խմբակցության պատգամավոր Արծվիկ Մինասյանը նշեց, որ ՀՅԴ խմբակցությունը դրական է համարում այդ օրենսդրական նախաձեռնությունը: Նա հարկ համարեց այնպիսի շեշտադրումներ առանձնացնել, որոնք ուղղված են կառավարության քաղաքականությանը:

Պատգամավորը նշեց, որ իր մոտ զարմանք է առաջացնում կառավարության կողմից տրված` ազդեցության գնահատականը, և այն, թե արդյո՞ք ոլորտի պատասխանատուները պատկերացնում են երկրի մակրոտնտեսական վիճակը: Նրա խոսքով՝ կառավարության տված` ազդեցության գնահատականը իրավական տեսանկյունից չի համապատասխանում իրականությանը:

«Ինձ մտահոգում է, թե,  մակրոտնտեսական զարգացման տեսանկյունից, ի՞նչ կտա սա: Կառավարությունն ու ԿԲ-ն չեն ասում, թե որն է այն սահմանանիշը, որի պարագայում դրական արդյունք կունենան, չեն ասում, թե որքանով է շուկան ուսումնասիրված, որովհետև դա ազդում է մասնավոր շուկայում այլ ճանապարհներով միջոցների ներգրավման վրա: Գաղտնիք չէ, որ այսօր բանկային համակարգը ֆինանսական շուկայում մեծ մասնակցություն ունի, մինչդեռ` ֆինանսավորման այլընտրանքային միջոցները, ինչպիսին կապիտալի շուկան է, այսօր հայտնվել է ծանր վիճակում, որովհետև չկա այդ մրցակցությունը»,- ասաց Արծվիկ Մինասյանը:

Պատգամավորը նշեց, որ մրցակցության վերաբերյալ կառավարության գնահատականը նույնպես տարակուսանք է առաջացնում, քանի որ պարզվում է, որ ավանդների դրամական շուկան, որևէ շուկա չէ ու կապ չունի երկրի տնտեսության հետ, բայց դա, ըստ պատգամավորի, աբսուրդ է:

«Ուրեմն ինչո՞ւ է պետք է ազդեցության գնահատման ինստիտուտը, եթե մենք այսպես ենք վերաբերվում օրենքով սահմանված պահանջներին»,- ասաց նա՝ հավելելով, որ պատգամավորները պետք է պահանջկոտ լինեն կառավարության ներկայացրած օրենքների ազդեցության գնահատականի նկատմամբ, իսկ կառավարությանը կոչ արեց պատշաճ ներկայացնել օրենքների ազդեցության գնահատականը: