Կարծում եմ` դիտարժան խաղ կստացվի. Լևոն Պաչաջյան

Այսօր` ժամը 19:00-ին, «Հանրապետական» մարզադաշտում կմեկնարկի Հայաստանի գավաթի խաղարկության եզրափակիչ` «Փյունիկ»-«Միկա» հանդիպումը: Yerkir.am-ի հետ զրույցում Հայաստանի ազգային հավաքականի նախկին հարձակող Լևոն Պաչաջյանն իր կարծիքը հայտնեց գավաթային հանդիպման վերաբերյալ:

«Կողմերի հնարավորությունը, միանշանակ, հավասար եմ գնահատում: Չնայած «Միկա»-ն ավելի գավաթային թիմ է համարվում, բայց «Փյունիկ»-ն էլ,  իր հերթին, մի քանի անգամ դարձել է գավաթակիր և այսօր լավ մարզավիճակում է: Կարծում եմ` հետաքրքիր և դիտարժան խաղ կստացվի»,- ասաց նա:

 Խոսելով առաջնության մասին` Պաչաջյանն ասաց. «Հետևում եմ Բարձրագույն խմբի առաջնությանը, բայց խաղերն ամբողջական չեմ դիտում։ Միայն համացանցում հայտնված դրվագներըն եմ նայում և ընդանուր կարծիքներին հետևում։ Կարծում եմ` «Փյունիկ»-ն, իրոք, արժանի է այս տարվա չեմպիոնությանը։ Սարգիս Հովսեփյանը, ստանձնելով «Փյունիկ»-ի ղեկը, նոր շունչ հաղորդեց երիտասարդ կոլեկտիվին։ Ցավոք, պետք է նշեմ, որ առաջնության մակարդակն այն չէ։  Բոլորս էլ  հասկանում ենք, որ 8 ակումբով դժվար է մրցակցություն ստեղծել, հատկապես, որ այդ ակումբների մեծ մասը ֆինանսական մեծ միջոցներ չունեն կամ ներդրումներ չեն կատարում: Այդ առումով` նախկինում շատ ավելի բարձր էր առաջնության մակարդակը ու ավելի մրցունակ»: