Գրական հայերենը «փայ» բառ չունի, եթե բարբառային իմաստը բացատրեմ, հակառակ պատկերը կստացվի

ԱԺ արտահերթ նիստում քննարկվում է կառավարության ներկայացրած «Գյուղացիական կոոպերացիաների մասին» օրենքի ընդունումը: Նախագծի ընդունումից և կիրառումից ակնկալվում են հետևյալ արդյունքները`

-կբարելավվեն գյուղատնտեսական կոոպերատիվների զարգացման օրենսդրական հիմքերը,

-կհստակեցվեն գյուղատնտեսական կոոպերատիվների զարգացման բնագավառում պետական քաղաքականության հիմնական ուղղությունները,

-կխթանվի գյուղատնտեսական կոոպերատիվների ձևավորումը,

-կբարձրանան գյուղացիական տնտեսությունների գործունեության արդյունավետությունը, տնտեսվարողների մրցունակությունը, երկրի պարենային անվտանգության մակարդակը:

Կոոպերատիվների գործունեությունը կնպաստի նաև գյուղական համայնքների զարգացմանը: ՕԵԿ-ական պատգամավոր Հեղինե Բիշարյանին դուր չեկավ օրինագծում «փայ» բառի կիրառումը, նա դա համարեց ավելի շատ ժարգոնային բառ: Արձագանքեց ԱԺ նախագահ Գալուստ Սահակյանը.

«Գրական հայերենը փայ բառ չունի, և եթե բառբառային իմաստը բացատրեմ, լրիվ հակառակ պատկերը կստացվի: Հայերենում փայ բառ գոյություն չունի, գոյություն ունի բաժնեմաս բառ»,- ասաց Գալուստ Սահակյանը: ԱԺ փոխնախագահ Հերմինե Նաղդալյանն էլ հավելեց, որ փայ բառը ժարգոնի հետ կապ չունի, դա ընդամենը տնտեսագիտական տերմին է: