Պուտինի ասածը Երևանում կունենա ինչ-որ հետևանքներ. Պոզներ

Հայտնի հաղորդավար Վլադիմիր Պոզները անդրադարձել է վերջին շրջանի կարևոր իրադարձություններին՝ Պուտինի «ուղիղ կապին», ՌԴ նախագահի այցին Երևան, Ռուսաստան-ԱՄՆ հարաբերություններին:

Նա ուշադրություն է հրավիրել Հայոց ցեղասպանության 100-ամյա տարելիցի հետ կապված իրադարձություններին՝ նշելով, որ նկատի ունի ոչ թե ինքնին տարելիցը, այլ այն` ինչ ասաց Պուտինը Երևանում:

«Թուրքիան, ինչպես հասկանում եք, Ռուսաստանի համար կարևոր երկիր է, քանի որ խոսքը գնում է գազատարի մասին, և, իհարկե, այդպես կտրուկ փչացնել Թուրքիայի հետ հարաբերությունները ոչ ոք չի ցանկանում: Սակայն, այնուամենայնիվ, ասվեց այն, ինչ ասվեց: Այն, որ դա եղել է ցեղասպանություն: Ինչպիսի հաշվարկ է եղել այնտեղ, մենք դեռ կտեսնենք, ամեն ինչ կկատարվի մեր աչքի առաջ, սակայն կարծում եմ, որ ինչ-որ հետևանքներ կլինեն»,- ասել է Պոզները: