Գազի գնի նվազման շուրջ համաձայնություն է ձեռք բերվել. Россия 24-ի ռեպորտաժը

Россия 24 հեռուստաալիքի Энергетика հաղորդումն անդրադարձել է Հայաստան մատակարարվող ռուսական գազին:

Նշվում է, որ Հայաստանում գազի սպառումն ավելանում է, վերջին տարիներին  գազամատակարարման ծավալն անցել է 2 մլրդ խորանարդ մետր ցուցանիշը, ընդ որում` Հայաստանը չունի պարտքեր:

Անդրադարձ է կատարվում «Գազպրոմ»-ի նախագահ Ալեքսեյ Միլերի՝ Երևան կատարած այցին: Հաղորդվում է, որ ՀՀ նախագահ Սերժ Սարգսյանի հետ բանակցությունների ժամանակ Երևանի համար ռուսական գազի գնի զեղչի շուրջ համաձայնություն է ձեռք բերվել։

Միլերի խոսքերով՝  հաշվի առնելով Հայաստանի անդամակցությունը ԵՏՄ-ին՝ գազի գինը կնվազի՝ կազմելով 165 դոլար խորանարդ մետրի դիմաց, մինչդեռ մինչև վերջերս այն 190 դոլար էր:Նշենք, սակայն, որ սովորական սպառողի համար գազն, ըստ էության, չի էժանանա. այս զեղչի միակ դրական կողմն այն է, որ գազը սպառողի համար չի թանկանա:

Միլերը նշել է, որ հայ գործընկերների հետ ձեռք է բերվել պայմանավորվածություն գազիֆիկացման գլխավոր սխեմա մշակելու մասին: Նա նշել է, որ իրենք նպատակ ունեն Հայաստանում գազիֆիկացման մակարդակը հասցնել 100 տոկոսի:

Հաղորդումը նաև պատմում է, թե ինչ վիճակում է այսօր Հայաստանում գազի ոլորտը և զարգանալու ինչպիսի հեռանկարներ ունի։