Մեր պահանջատիրությունը պետք է ներառված լինի երեք ասպեկտներում

Արդեն տեղեկացրել ենք, որ Մեծի Տանն Կիլիկիո կաթողիկոսարանը հայց է ներկայացնում Թուրքիայի Սահմանադրական դատարան` պահանջելով Սիսի կաթողիկոսարանի վերադարձը: Ուշագրավ է, որ վերջին օրերին Հայաստանի նախագահ Սերժ Սարգսյանը հայտարարում է, թե Թուրքիայից հողային պահանջներ չունենք:

Yerkir.am-ի հետ զրույցում ԵՊՀ արևելագիտության ֆակուլտետի փոխդեկան, թուրքագետ Ռուբեն Մելքոնյանը, անդրադառնալով վերոնշյալ պահանջին, ընդգծեց, որ մեր պահանջատիրությունը պետք է ներառված լինի երեք ասպեկտներում:

«Առաջինը` Հայաստան պետության կողմից պետք է պահանջներ ներկայացվեն, երկրորդը` Հայ Առաքելական եկեղեցու կողմից, և երրորդը` անհատների կողմից պետք է լինեն պահանջները: Կարծում եմ` այն քայլը, որը արել է Մեծի Տանն Կիլիկիո կաթողիկոսարանը տեղավորվում է հայոց պահանջատիրության այս բաղադրիչներից մեկի մեջ»,- նշեց թուրքագետը:

Ըստ նրա` գաղտնիք չէ, որ Հայ Առաքելական եկեղեցին Թուրքիայի տարածքում ունեցել է բազմաթիվ եկեղեցիներ, վանքեր:

«Բնական է, որ հայոց ամենակարևոր պահանջատերերից մեկն էլ եկեղեցին է: Կարծում եմ, որ այս երեք պահանջատիրական ուղղությունները կարող են ինչպես իրար զուգահեռ գոյություն ունենալ, այնպես էլ` իրարից անկախ: Այսինքն` Հայոց եկեղեցին ներկայացնի իր պահանջները, անհատները ներկայացնեն իրենց պահանջները, Հայաստան պետությունն էլ, աշխարհաքաղաքական իրավիճակից ելնելով, հարմար պահի ներկայացնի իր պահանջները: Այնպես որ` Մեծի Տանն Կիլիկիո կաթողիկոսարանի քայլը ողջունելի է»,- ասաց Մելքոնյանը:

Անդրադառնալով կաթողիկոսարանի ներկայացրած պահանջի իրավականությանը` նա ընդգծեց. «Դրա իրավականության հետ կապված` հուսանք, որ ամեն ինչ նորմալ կընթանա: Ինձ համար անհասկանալի է, թե ինչու են դիմել Սահմանադրական դատարան, քանի որ ՍԴ-ն պահանջում է օրենքների սահմանադրականությունը: Չգիտեմ` ինչքանով են գույքային հարցերը ևս կարգավորվում այդ դատարանում, բայց հուսամ, որ կաթողիկոսությունն ունի իրավական լավ խորհրդատուներ, որոնք էլ այդ գործընթացը հաջող ուղիով կտանեն»: