Ցավոք, մենք չենք ապրում մի երկրում, որ Ցեղասպանության ճանաչման մասին խոսեինք որպես անցած երևույթի

Այսօր երեկոյան` ժամը 20:30-ին, Հանրապետության հրապարակում տեղի կունենա «24/04» նվագախմբի համերգը: 43 երկրի 123 երաժիշտներ համախմբվել են` Ցեղասպանության զոհերի հիշատակը հարգելու և իրենց բողոքի ձայնը բարձրացնելու համար:

Yerkir.am-ի հետ զրույցում Հայաստանի պետական երիտասարդական նվագախմբի դիրիժոր Սերգեյ Սմբատյանը նշեց, որ այսօրվա համերգը միայն համերգ չէ կամ ինչ-որ նախագիծ, որի մասին շատ են խոսում, սա երաժշտական և սոցիալական երևույթ է:

«Անկախ Հայաստանի մայրաքաղաքում 100 տարի անց դասական երաժշտության միջոցով մենք բարձրաձայնում ենք մեր ցավի մասին: Համերգին մասնակցող 43 երկրի երաժիշտները շատ լավ են պատկերացնում` ինչ են անում և ինչու են եկել այստեղ, ինչ խնդիր կա: Նրանք գիտեն, որ իրենք բոլորը դառնում են այն գաղափարի կրողը, որը պետք է իրենց ուղեկցի ամբողջ կյանքի ընթացքում: Շնորհակալ եմ նրանց, քանի որ նրանք հասկանում են, որ մեզ պետք են»,- ասաց Սմբատյանը` հավելելով, որ հիանալի է, երբ քո ցավը կիսում է մեկը, ով չունի նման խնդիր և այսօր գալիս-կանգնում է քո կողքին:

Ըստ նրա` արվեստը միակ ուժն է, որ չի ճանաչում ազգություն, հավատ, տարիք, խնդիր, տեսակ: «Կա մեկ ուժ, կա մեծ խնդիր և այն մեծ ցավը, որ մեր մեջ կա, նաև այն ասելիքը, որ մենք ունենք, փորձում ենք ճիշտ ներկայացնել: Ցավոք, մենք հիմա չենք ապրում մի երկրում, որ Ցեղասպանության ճանաչման մասին խոսեինք որպես անցած երևույթի: Ինչո՞ւ ենք հենց ապրիլի 24-ն առանձնացրել, որովհետև այդ օրը մտավորականների խնդիրը լուծվեց: Սա խոսում է այն մասին, որ հենց արվեստի միջոցով էլ պետք է այդ մասին խոսվի և ապացուցվի»,- ասաց Սմբատյանը:

Ի դեպ, համերգը բաղկացած է լինելու 4 մասից` երախտագիտություն, հիշողություն, միջազգային պայքար և վերածնունդ: