Ականատես ենք լինում մի երևույթի, որը հրդեհի վտանգի է ենթարկում ԱԺ շենքը. Բաբլոյանը` Արարատ Միրզոյանի և Լենա Նազարյանի ակցիայի մասին

«Քաղաքացիական պայմանագիր» կուսակցության պատգամավորներ Արարատ Միրզոյանի և Լենա Նազարյանի իրականացրած ակցիայից հետո ԱԺ նախագահ Արա Բաբլոյանը ելույթով հանդես եկավ և ասաց, որ քննարկվում է նախագիծ, որի նպատակը քաղաքացիների անվտանգությունը պահպանելն է, մինչդեռ ականատես են լինում մի երևույթի, որը հրդեհի վտանգի է ստեղծում ԱԺ շենքում:

Ակցիայի ժամանակ ԱԺ-ն քննարկում էր «Առևտրի և ծառայությունների մասին» օրենքում փոփոխություններ կատարելու մասին» օրինագիծը:

Բաբլոյանի խոսքով` պատգամավորների գործողությունները ստիպում են դահլիճում աշխատող պատգամավորներին` շնչել թունավոր նյութեր։

«Ես ոչ միայն որպես ԱԺ նախագահ, այլև ուղղակի որպես քաղաքացի և որպես բժիշկ եմ հանդես գալիս, որը չի կարող հանդուրժել, որ, քաղաքական կամ որևէ այլ նպատակներից ելնելով, պատգամավորներին և քաղաքացիներին դնեն այնպիսի պայմանների մեջ, որոնք վտանգում են նրանց առողջությունն ու կյանքը։ Պատկերացնո՞ւմ եք, թե ինչ կլիներ, եթե հրդեհ բռնկվեր։ Այստեղ 700 աշխատակից պետք է վտանգված լիներ։ Ես այդ արարքն անընդունելի եմ համարում»,- ասաց նա։