Եվրախորհրդարանի ընդունած փաստաթուղթն առաջին անգամ է նման հայանպաստ համատեքստում. ՍԴ իրավախորհրդատվական բաժնի պետ

Սահմանադրական դատարանի իրավախորհրդատվական բաժնի պետ, միջազգային իրավունքի փորձագետ Վլադիմիր Վարդանյանն այսօր լրագրողների հետ հանդիպման ժամանակ ասաց, որ Եվրախորհրդարանի` Հայոց ցեղասպանության վերաբերյալ ընդունած փաստաթուղթն աննախադեպ էր:

«Եվրախորհրդարանի` Հայոց ցեղասպանության վերաբերյալ փաստաթուղթն աննախադեպ էր այն առումով, որ առաջին անգամ նման հայանպաստ համատեքստի շրջանակներում ընդունվեց՝ ապրիլի 24-ի նախօրյակին, բայց, ընդհանուր առմամբ, այս որոշումը դեռևս 1987թ. սկսված գործընթացի բաղկացուցիչ մասն է: Այդ ժամանակ առավել մանրամասն քննարկվեցին և' Հայոց ցեղասպանության պատժելիության, և' Հայոց ցեղասպանության որակման, և' հայ-թուրքական հարաբերությունները բնականոն հուն տեղափոխելու հարցերը»,- ընդգծեց Վարդանյանը:

Նրա բնորոշմամբ՝ նոր փաստաթուղթն առավել կարևոր է և նախորդ փաստաթղթերից առանձնանում է նրանով, որ ավելի շատ է ընդգծվում Հայաստան-Թուրքիա հարաբերությունների բարելավման անհրաժեշտությունը: «Չպետք է շատ ռոմանտիկ լինել և ասել, որ այս փաստաթուղթը զուտ ուղղված է Հայաստանի և հայ ժողովրդի իրավունքների վերականգնմանը։ Այն նաև այլ քաղաքական խնդիրներ է հետապնդում, ինչպես նաև Թուրքիայի և ԵՄ-ի հետագա հարաբերակցության առնչությամբ ընդունված փաստաթուղթ է»,- նշեց Վարդանյանը:

Նա հավելեց, որ, իրավական փաստաթուղթ լինելով հանդերձ, շատ հնարավոր է, որ այն իրավական լուրջ ազդեցություն չթողնի հետագա գործընթացների վրա:

Հարցին` հնարավո՞ր է` ընդունված փաստաթուղթը խոչընդոտի Թուրքիայի՝ ԵՄ-ին անդամակցելուն, բանախոսը պատասխանեց. «ԵՄ-ին անդամակցելու համար էլ այն լուրջ խոչընդոտ չի կարող հանդիսանալ»: