Եվրախորհրդարանի ընդունած փաստաթղթում այս անգամ Հայաստանը ներկայանում է որպես սուբյեկտ. Ալեքսանդր Արզումանյան

ԱԺ պատգամավոր Ալեքսանդր Արզումանյանն այսօր լրագրողների հետ հանդիպման ընթացքում, խոսելով Եվրախորհրդարանի՝ Հայոց ցեղասպանության վերաբերյալ ընդունած բանաձևի մասին, նշեց. «Շատ կարևոր էր, սակայն աննախադեպ չէր այն, քանի որ 1987 թվականին ևս ընդունվել է նմանատիպ փաստաթուղթ: Բայց, ի տարբերություն նախորդի, այս պարագայում առաջին անգամ է, թերևս, որ ՀՀ-ն հանդես է գալիս որպես սուբյեկտ այս գործընթացի մեջ»:

Ալեքսանդր Արզումանյանի դիտարկմամբ՝ բազմիցս քննադատության է արժանացել այն հանգամանքը, որ բազմաթիվ պետություններ մեր այս ողբերգությունն օգտագործում են իրենց շահերը սպասարկելու համար, սակայն այս դեպքում այդ մոտեցումը չեզոքանում է: «1987 թվականին Եվրոպան դեռևս պատրաստ չէր` նման որոշում կայացնելու, իսկ այս որոշումը Հայաստանի ակտիվ աշխատանքի արդյունքն է, և այս գործընթացը գնում էր տարբեր ձևաչափերով: Շատ էին կարևոր և լավ շեշտադրումները: Սա պատեհ առիթ է մեզ համար հնարավորինս լայն ներկայանալու: 100-ամյա տարելիցը հանգրվանային պահ է,  և, ասես, մենք կարողանում ենք այն օգտագործել»,- ընդգծեց պատգամավորը: