«Թուրքական ԶՈՒ արխիվներում Հայոց ցեղասպանության մասին լուրջ փաստեր կարող են լինել»

ԵՊՀ արևելագիտության ֆակուլտետի փոխդեկան, թուրքագետ Ռուբեն Մելքոնյանը Yerkir.am-ի հետ զրույցում, անդրադառնալով Թուրքիայի վերջին մերկապարանոց հայտարարություններին, նշեց, որ այդ երկրի դիվանագիտությունն արդեն տասնյակ տարիներ աչքի է ընկնում ստանդարտ քայլերով:

«Թուրքական դիվանագիտությունը տասնյակ տարիներ ստանդարտ քայլեր է անում` ագրեսիվ հայտարարություններով, դիվանագիտական էթիկայից դուրս բնորոշումներով է հանդես գալիս: Այս անգամ էլ ականատես ենք լինում նույն պատկերին: Թուրքիայի բարձրաստիճան պաշտոնյաները, չկարողանալով տեղավորվել դիվանագիտական գործունեության մեջ, հանդես եկան ագրեսիվ հայտարարություններով»,- ասաց նա:

Մելքոնյանը շեշտեց այն հանգամանքը, որ թուրքերն այս անգամ իրենց գործողություններում ներգրավել են նաև հոգևոր գործիչների: «Նրանք պապին անվանեցին կեղծարար, բացի այդ` մի նոր միտում էր այն, որ Թուրքիայի ղեկավարները փորձեցին նաև այս հարցում ներգրավել թուրք, մուսուլման հոգևոր գործիչներին: Հայտարարությամբ հանդես եկավ նաև Թուրքիայի կրոնական հարցերով հանձնաժողովի նախագահը կամ նախարարի ստատուս ունեցող մարդ, ով հայտարարեց, որ Պապի քայլերն իբրև թե միջկրոնական թշնամանք են պարունակում»,- ընդգծեց թուրքագետը:

Նա նշեց նաև, որ Թուրքիայի վերջին օրերի հայտարարությունների մեջ կարելի է մի ուշագրավ դրվագ առանձնացնել: «Այս ամենում ինձ համար մի հետաքրքիր դրվագ կար: Էրդողանն իր հայտարարությամբ ակնհայտ քննադատում է Պապին և զգուշացնում: Կարծում եմ՝ քաղաքակրթական նորմերից դուրս է Պապին զգուշացում և նման հայտարարություն անելը: Խոսելով պատմաբանների, պատմական արխիվները բացելու մասին` Էրդողանը հստակ հայտարարեց նաև, որ իրենք պատրաստ են անգամ բացել իրենց ռազմական արխիվները: Դրանով նա առաջին հերթին ցույց տվեց, որ իրականում թուրքական ոչ բոլոր արխիվներն են բաց, ֆիքսեց, որ կոնկրետ զինված ուժերի արխիվները փակ են և խոստովանեց, որ իրականում զինված ուժերի արխիվներում կարող են լուրջ փաստեր լինել Հայոց ցեղասպանության մասին»,- ասաց Մելքոնյանը:

Թուրքագետի բնորոշմամբ՝ Էրդողանի այս հայտարարությունը նման էր ինքնախոստովանության կամ անզգուշորեն ու անգիտակցաբար արված խոսքի: «Էրդողանի հայտարարության մեջ միակ նոր կետը ռազմական արխիվների հետ կապված ինքնախոստովանական, անգիտակցաբար կամ անզգուշաբար արած հայտարարությունն էր: Թուրքական իշխանությունների այս հայտարարություններն արդեն որևէ ազդեցություն չեն կարողանում ունենալ անգամ իրենց երկրի ներսում, քանի որ ստանդարտ են»,- եզրափակեց Ռուբեն Մելքոնյանը: