Կինոյի մասին օրենքի նախագծի առաջին` փորձնական տարբերակը 10-15 օրից պատրաստ կլինի

Հաճախ են ասում, թե կինոյի մասին օրենք ունենալը ժամանակավրեպ է, սակայն այդպես չէ: Այսօր լրագրողների հետ հանդիպման ժամանակ նման կարծիք հայտնեց Հայաստանի ազգային կինոկենտրոնի տնօրեն Գևորգ Գևորգյանն` անդրադառնալով կինոյի մասին օրենքի նախագծի ստեղծմանը:

Նշենք, որ կինոյի մասին օրենքի նախագծի առաջին` փորձնական տարբերակը, Գևորգյանի հավաստմամբ, 10-15 օրից պատրաստ կլինի: Ըստ նրա` կինոյի մասին օրենքն առաջին հերթին կնպաստի ոչ թե կինո ստեղծելուն, այլ այն խնդիրների վերացմանը, որոնց առջև հիմա կանգնած է ժամանակակից կինոգործիչը:

«Ֆիլմերի տարածման, արտահանման խնդիրներ կան: Այսօր մի շարք ռեժիսորներ ցանկանում են գալ Հայաստան և այստեղ կինո նկարել, բայց նրանց համար համապատասխան պայմաններ է պետք ստեղծել: Կարծում եմ` կինոյի մասին օրենքը կնպաստի նաև արտոնագրային համակարգ ունենալուն: Կա նաև մի կետ, ըստ որի` կլինեն որոշակի սահմանափակումներ և ինչ-որ կառույց, որը կորոշի` ինչ ֆիլմեր պետք է թույլատրվի ցուցադրել, որոնք` ոչ»,- ասաց Գևորգյանը:

Ըստ նրա` կինոյի մասին օրենքը կհեշտացնի նաև հարկային ու մաքսային դաշտում գործունեությունը. «Մի խոսքով` հայկական կինոյի կյանքը կհեշտացնի»:

Ի դեպ, նախագծի առաջին տարբերակը պատրաստ լինելուն պես կուղարկվի բոլոր կինոգործիչներին, պրոդյուսերներին: