«Նոր անուններ» փառատոնին կմասնակցեն երաժիշտ-կատարողներ աշխարհի 10 երկրից

Հունիսի 1-ից 4-ը Երևանում կանցկացվի պատանի երաժիշտ-կատարողների «Նոր անուններ» չորրորդ միջազգային փառատոնը: Կմասնակցեն մինչև 18 տարեկան շուրջ 4 տասնյակ շնորհալի պատանի երաժիշտ-կատարողներ՝ մրցույթների ու փառատոների բազմակի դափնեկիրներ, տարբեր հիմնադրամների կրթաթոշակառուներ Հայաստանից, Դանիայից, Կանադայից, Կուբայից, Լատվիայից, Վիետնամից, Վրաստանից, Ռուսաստանից, Չեխիայից և Մալթայից:

Այս տարի փառատոնը նվիրվում է Հայաստանի «Նոր անուններ» ծրագրի հիմնադրման 25-ամյակին: Այդ առիթով, փառատոնի շրջանակում հանդես կգան նաև ծրագրի անցյալ տարիների մասնակիցներ, ովքեր այսօր ճանաչված են միջազգային ասպարեզում: Հունիսի 1-ին Երևանի Կոմիտասի անվան կամերային երաժշտության տանը տեղի կունենա փառատոնի հանդիսավոր բացումը:

Պատանի երաժիշտները հանդես կգան Հայաստանի պետական կամերային նվագախմբի հետ: Հունիսի 2-ին և 3-ին Կոմիտասի անվան կամերային երաժշտության տանը պատանի երաժիշտները կներկայանան մենանվագ կատարումներով: Հունիսի 4-ին «Արամ Խաչատրյան» համերգասրահում տեղի կունենա փառատոնի հանդիսավոր փակումը, որի շրջանակում պատանի մենակատարները ելույթ կունենան Հայաստանի պետական ֆիլհարմոնիկ նվագախմբի հետ:

Փառատոնը կազմակերպում է «Մշակույթի գործիչների ընկերակցություն» ՀԿ-ն ՀՀ մշակույթի նախարարության աջակցությամբ և առաջին տիկին Ռիտա Սարգսյանի բարձր հովանու ներքո: «Նոր անուններ» ծրագրի ղեկավարն է «Մշակույթի գործիչների ընկերակցության» նախագահ, ՀՀ մշակույթի վաստակավոր գործիչ Սիլվա Մեքինյանը: Այս մասին հայտնում է մշակույթի նախարարության կայքը: