Տիգրան Համասյանի մասին ֆիլմ է նկարահանվել

Ապրիլի 2-ին «Գաֆէսճեան» արվեստի կենտրոնում կցուցադրվի «Տիգրան» 52 րոպե տևողությամբ վավերագրական ֆիլմը՝ նվիրված հայտնի հայ դաշնակահար Տիգրան Համասյանին: Ֆիլմի սցենարի հեղինակն ու ռեժիսորը Ադրիեն Ռիվոլիեն է:

Ֆիլմը պատմություն է մի երիտասարդի մասին, ով ողջ էությամբ տարված է երաժշտությամբ:

Ավելի վաղ Համասյանը yerkir.am-ի հետ զրույցում նշել էր, որ ֆիլմը ստեղծվել է ոչ իր նախաձեռնությամբ, ավելին` ինքն անգամ դեմ է եղել ֆիլմի ստեղծմանը. «Սակայն ես ու Ադրիենն ընկերացանք, և 3 տարի նա ինձ հետևեց աշխարհի տարբեր ծայրերում ու ստացավ թույլտվություն` ֆիլմ նկարելու»:

Ֆիլմը փաստավավերագրական է, այն ներկայացնում է Համասյանի ստեղծագործելու ընթացքը: Ֆիլմը նվիրված է Ադրիենի տատիկին, բայց քանի որ Ադրիենը շատ է նկարել Համասյանին ու իր տատին միասին, այն, Համասյանի կարծիքով, կարծես տատ ու թոռ հարաբերությունները ներկայացնի: