Ինչ են խոսել Պուտինը և Էրդողանը՝ ըստ Կրեմլի

Արդեն հայտնել ենք, որ Թուրքիայի նախագահ Ռեջեփ Թայիփ Էրդողանը հեռախոսազրույց է ունեցել Ռուսաստանի նախագահ Վլադիմիր Պուտինի հետ: Ըստ թուրքական «Անադոլու»-ի՝  կես ժամ տևած զրույցի ընթացքում կողմերը քննարկել են էներգետիկ ոլորտում համատեղ աշխատանքների կարևորությունը, ինչպես նաև անդրադարձել են Հայոց ցեղասպանության հարցին: Պուտինին հայտնելով, թե այդ հարցում «Թուրքիան կողմ է պատմությանը արդար հիշողության հեռանկարով մոտեցում ցուցաբերելուն», Էրդողանը դժգոհել է Հայաստանից «խաղաղության կոչերն անտեսելու, պատմաբանների համատեղ հանձնաժողով ստեղծելու առաջարկին բացասական մոտեցում ցուցաբերելու» համար: 

Ուշագրավ է, որ Պուտինի պաշտոնական կայքում տեղադրված հաղորդագրությունում խոսք անգամ չկա Ցեղասպանության թեմայի մասին: Նշվում է միայն, որ կողմերը քննարկել են երկկողմ փոխհամագործակցությանը վերաբերող և էներգետիկ հարցեր, մասնավորապես՝ «Թուրքական հոսք» նախագիծը: