Հաճախ պարզունակ մակարդակի վրա է դիտվում սահմանադրական փոփոխությունների հարցը. Արծվիկ Մինասյան

Այսօր ԱԺ-ում  ԱԺ ՀՅԴ խմբակցության պատգամավոր Արծվիկ Մինասյանը լրագրողների հետ խոսել է սահմանադրական փոփոխությունների մասին:

Նա նշել է, որ սահմանադրական փոփոխությունների կենտրոնական տեղում կառավարման համակարգի փոփոխությունն է, որից ածանցվում է համամասնական ընտրակարգն` ամբողջությամբ, և որ խորհրդարանական ընտրությունների հիմքը 100 տոկոսանոց ընտրական համակարգն է:

Սահմանադրական փոփոխությունների երկրորդ հստակ ազդակը քաղաքական համակարգի առողջացումն է, խոսքը վերաբերում է թե' ընդդիմություն-իշխանություն և թե' քաղաքական ուժերի դերակատարման մեծացմանը, այդ թվում` քաղաքական կուսակցությունների ներքին ժողովրդավարարական համակարգերի հզորացմանը, ֆինանսական առողջացմանը և քաղաքական ուժերի պատասխատավության հստակ ամրագրմանը:

Մյուս կարևոր ուղղությունը, ըստ Արծվիկ Մինասյանի, վերաբերում է քաղաքացիական հասարակությանը, մարդու իրավունքներին: Հաջորդ կարևոր ուղղությունը մարդու սոցիալական տնտեսական իրավունքների իրականացման մեխանիզմների ամրագրումն է` հռչակագրային նորմերից անցում կատարելով իրական մեխանիզմներին:

«Ցավում եմ, որ այս հարցերը չեն քննարկվում, ու հաճախ պրիմիտիվ մակարդակի վրա է դիտվում սահմանադրական փոփոխությունների հարցը, մինչդեռ` սահմանադրական փոփոխությունները, երբ ամբողջ ծավալով նայում ենք, մեր առօրյա կյանքն է, ահա` ինչու մեր քաղաքացիներից շատերը պրակտիկայում չեն պատկերացնում սահմանադրական փոփոխությունների դրական կողմը իրենց կյանքի համար: Այնինչ` եթե կյանքի կոչվեն սահմանադրական փոփոխությունները, քաղաքացին իր առօրյա կյանքում է զգալու դրա դրական ազդեցությունը: Մենք չենք էլ պնդում, որ, հանրաքվեի հաջորդ օրվանից սկսած, քաղաքացին սկսելու է լավ ու հարուստ ապրել, բայց սկսվում է գործընթաց, որտեղ քաղաքացին ինքն իրեն իրացված է զգալու, և դրա երաշխավորը կառավարման խորհրդարանական համակարգն է լինելու»,- ասաց Արծվիկ Մինասյանը:

Մանրամասները` տեսանյութերում: