Ըստ Ռուբեն Հակոբյանի` Լեւոն Տեր-Պետրոսյանի ձեւակերպումը լուրջ չի ընդունվել

ԱԺ «Ժառանգություն» խմբակցության ղեկավար Ռուբեն Հակոբյանը Yerkir.am-ի հետ զրույցում, անդրադառնալով Տեր-Պետրոսանի այն ձեւակերպմանը, թե ՀԱԿ-ը ընդդիմադիր դաշտում միայնակ է մնացել, ասաց. «Պետք է այստեղ վկայակոչեմ մի ժողովրդական իմաստություն, այն է՝ «Հալվա ասելով` շուրթերդ չեն քաղցրանա»:

Պատգամավորը նշեց, որ ինքը չգիտի՝ ով է որոշել, որ ՀԱԿ-ը միակ ընդդիմադիր կուսակցությունն է, բայց կարծում է, որ այդ ձևակերպումն ավելի շատ հարված է հասցնում հենց ՀԱԿ-ին, քան նպաստում նրա հեղինակության բարձրացմանը:

«Այսպիսի մոտեցումը պարզապես վնասում է ընդդիմադիր դաշտում գտնվող մյուս քաղաքական ուժերին, ուստի ես չեմ կարծում, որ դա ճիշտ քաղաքագիտական վերլուծություն է, և չեմ կարծում, որ դա լուրջ է ընդունվել հասարակության կողմից»,- ասաց Հակոբյանը:

Նա նշեց, որ ինքը չէր ցանկանա, որ առաջին նախագահը նման ելույթ ունենար, չէր ցանկանա, որ ընդդիմադիր դաշտի վրա նման հարձակում լիներ:

Ռուբեն Հակոբյանը իրենց խմբակցության և ԲՀԿ-ի հետագա համագործակցության հնարավորության մասին որևէ մեկնաբանություն չցանկացավ անել՝ նշելով, որ ամեն ինչ պարզ կլինի ԲՀԿ-ի համագումարից հետո: