Երբ հայերը լքեցին այս հողերը, մենք ծանոթացանք աղքատության հետ. քուրդ քաղաքապետ

Թուրքիայի քրդաբնակ Մարդինի քաղաքապետ, քրդական Ժողովուրդների դեմոկրատական կուսակցության անդամ Ահմեթ Թուրքը Գերմանիայում խոսել է հունիսին Թուրքիայում սպասվող խորհրդարանական ընտրությունների մասին:

Ըստ Demokrathaber-ի՝ Ահմեթ Թուրքը խոսել է նաև հայերի ու ասորիների հանդեպ իրագործված Ցեղասպանության մասին:

«Մենք ամաչում ենք հայերի ու ասորիների հանդեպ մեր պապերի արածների պատճառով: Այն ժամանակ, երբ հայերն ու ասորիները լքեցին այս հին հողերը, մենք ծանոթացանք չքավորության ու աղքատության հետ: Նրանք մեր երկրի հարստությունն էին»,- ասել է նա:

Կայքն այս հայտարարությունների համար քննադատել է քուրդ քաղաքապետին: «Պապերս» ասելով՝ նա ո՞ւմ նկատի ունի, պարզ չէ: Հարց է առաջանում՝ Հայկական սփյուռքի՝ թուրք ժողովրդի վրա բարդած Ցեղասպանության պնդումն Ահմեդ Թո՞ւրքն է ստանձնում»,-գրել է կայքը: