Արարատ Միրզոյանի և Լենա Նազարյանի ակցիայից հետո պատգամավորները լքեցին դահլիճը

Հայտնել ենք, որ «Ելք» խմբակցությունից ՔՊ-ի պատգամավորներ Արարատ Միրզոյանն ու Լենա Նազարյանը յուրահատուկ ակցիա իրականացրեցին ԱԺ նիստերի դահլիճում` վառելով հրավառության ջահեր: Ակցիայից հետո մի շարք պատգամավորներ լքեցին դահլիճը՝ նշելով, որ վատ են զգում դահլիճում հավաքված ծխից։

«Սա ակցիա՞ էր, սա՞ է պայքարի ձևը, սե՞նց են պայքարում»,- դահլիճից դուրս գալով` հայտարարեց ՀՀԿ-ական պատգամավոր Շուշան Պետրոսյանը: Նա նշեց, որ իրեն վատ է զգում և չի կարող պատասխանել այլ հարցերի։

Ուշագրավ էր «Ելք» խմբակցության քարտուղար Գևորգ Գորգիսյանի պահվածքը: Արդեն հայտնել ենք, որ նա ընդմիջում էր խնդրել, սակայն Շարմազանովն առաջարկել էր բացել դահլիճի դռները, որպեսզի օդափոխվի:

ՀՀԿ-ական պատգամավոր Ռուստամ Մախմուդյանն էլ չցանկացավ գնահատական տալ ակցիային, լրագրողներին ասաց. «Դուք տվեք գնահատականը»:

ԱԺ նիստը շարունակվում է: