Մնացածները թող դրա կեսի կեսով ժողովրդի կողքին լինեն, նոր մեզ դասեր տան. Արմեն Ռուստամյան

Այսօր լրագրողների հետ զրույցում ԱԺ ՀՅԴ խմբակցության ղեկավար Արմեն Ռուստամյանը, պատասխանելով հարցին, թե ինչո՞ւ են ՀՅԴ-ի վերջին շրջանի քվեարկությունները տարբերվում խորհրդարանական ոչ իշխանական ուժերի քվեարկություններից, պատասխանեց. «Մենք տարբերվում ենք նաեւ իշխանական ուժերից, ոչ միայն` ոչ իշխանականներից: Մենք միշտ ինքնուրույն քաղաքական գիծ ենք վարել, դա բոլորին է հայտնի: Բոլոր այն դեպքերում, երբ որեւէ տեսակետ համընկնում է այս կամ այն քաղաքական ուժի հետ, մենք ունենում ենք նույն քվեարկությունը կամ նույն մոտեցումը: Որեւէ այլ արտառոց բան այստեղ փնտրել պետք չէ»:

Նա օրինակ բերեց նախօրեին խորհրդարանում քննարկված` ՎՊ-ի հաշվետվության հարցի վերաբերյալ ոչ իշխանական ուժերի տարածած հայտարարությունը, որին ՀՅԴ-ն էլ էր միացել: «Եթե ճիշտ բան է ասվում, այդ ճիշտ բանը մենք միշտ պաշտպանում ենք: Եղել է խախտում. հաշվետվությունը պիտի ներկայացնի ՎՊ նախագահը: Դա կանոնակարգի իմպերատիվ պահանջն է: Բնականաբար, մենք այնտեղ ենք, որտեղ ճշմարտությունն է»:

Հարցին, թե ՀՅԴ-ն իշխանությա՞ն կողքին է, թե՞ ընդդիմության, պատգամավորը պատասխանեց. «Հասարակությունը պիտի միշտ իմանա, որ ՀՅԴ-ն իր կողքին է: Արդեն 125 տարի դա ապացուցվում է: Մնացածները թող դրա կեսի կեսով ժողովրդի կողքին լինեն, նոր մեզ դասեր տան»: