Արդյոք ընդունելի՞ է, որ Ձեզ պես տղերքը նստեն ու հարցազրույցներ տան, թե Ձեզ ոնց են ծեծել

Հարություն Հարությունյանը ֆեյսբուքյան իր էջում գրել է. «Ասում են ինչո՞ւ չես խոսում Բերձորում տեղի ունեցածի վերաբերյալ: Ասում եմ, «բայց ի՞նչ ասեմ, վատ բան եղավ, չպետք է լիներ նման բան»:

Երկու օր է կարդում եմ այն բոլոր գրառումները, որ հայտնվում են պատիս: Այնուամենայնիվ երկու գրարում կառանձնացնեի, որոնց մեջ ցավ կար, մտահոգություն կար և նաև՝ զգոնության կոչ: Այդ երկու գրառման հեղինակները ՎԱՐԴուհի Սիմոնյանն էր և Կարինե Աշուղյանը: Մնացածի դեպքում, զուտ էմոցիա էր և կներեք, «ֆեյսբուքյան մոդային» հարմարվելու համար, անիմաստ քլնգոց: Հիմա, երբ արդեն դեպքից անցել է երկու օր, ուզում եմ հարցնել, Ինչո՞ւ, ու՞մ էր պետք կամ ձեռնատու այս ամենը:

Չեմ կարող արդարցնել ոստիկանների նման պահվածքը, բայց նաև չեմ կարողանում հասկանալ այդ՝ «100 ամյակը առանց ռեժիմի» ակցիայի հեղինակներին: Իրոք: Ի՞նչ կապ ունի Արցախի Հանրապետությունը այդ ամենի հետ: Եղբայր, դուք հարց ունեք Հայաստանի իշխանությունների հետ, խնդրեմ, նրանք այստեղ են, գնացեք Ձեր խոսքը տեղ հասցրեք, մենք էլ, եթե համարենք, որ դուք ճիշտ եք, կգանք ձեզ կաջակցենք: Բայց գնում եք Արցախ, որ ի՞նչ անեք:

Արցախը այս օրերին ավելի լուրջ խնդիրների առջև է կանգնած, դուք, այնտեղ բազում ընկերներ ունեք, ովքեր ի տարբերություն Ձեզ, ուրիշ՝ շատ ավելի սոսկալի ռեժիմից են պաշտպանում այնտեղի ժողովրդին: Եթե, արդեն Տեղ գյուղում Ձեզ ընկերաբար զգուշացրել են, որ պետք չէ գնալ, ինչո՞ւ գնացիք: Հիմա կասեք, Հարութը իշխանությունների «թելն է թելում»: Ասեք ինչ ուզում եք, մտածեք , ինչ ուզում եք, ես մի բան գիտեմ, որ էդ «լամբակավոր» համազգեստ կրողների ուղեղները «թափված են» և բանականությունը նրանց համար խորթ հասկացողություն է:

Ցավում եմ, որ նման բան եղավ, բայց ես հավասարապես մեղադրում եմ երկու կողմին էլ: Եւ հետո, եթե գիտեք, որ նման կերպ են ընդունելու, Ձեր մարտավարությունը փոխեիք: Չէ, որ դուք «հնարամիտ» տղաներ եք, հրամանատարներ, ինչպես Ձեզ ներկայացնում են՝ պատերազմի հերոսներ: Բա Ձեր «պայծառ» միտքը, արժանապատվությունը ու՞ր կորան : Արդյո՞ք ընդունելի է, որ Ձեր պես տղերքը նստեն ու հարցազրույցներ տան այն մասին, թե Ձեզ ոնց են ծեծել: Տղերք, ինչ ուզում եք արեք, ինչ կառույց ուզում եք քանդեք, հերն էլ անիծած, եթե իհարկե կստացվի բայց Արցախից հեռու խաղացեք: Արցախը Ձեր պատվերների համար «աղանդեր» չէ»: