Մալախովը Հայաստան մեկ օրով՝ նկարահանումների համար է եկել

Ռուս հայտնի հեռուստահաղորդավար Անդրեյ Մալախովը, ով երեկ եկել էր Երևան` Գյումրու սպանդի վերաբերյալ հաղորդում նկարահանելու, նույն օրը վերադարձել է Մոսկվա:

Yerkir.am-ի տեղեկություններով` Մալախովը սկզբում հանդիպել է Շիրակի թեմի առաջնորդ Միքայել եպիսկոպոս Աջապահյանի հետ, զրուցել նրա հետ: 

Այնուհետև հանդիպել է Գյումրու քաղաքապետ Սամվել Բալասանյանի, սպանդի զոհերի հարևանների ու հարազատների հետ: Մալախովը բոլորի հետ զրույցում մի քանի անգամ ներողություն է խնդրել, որ Գյումրու սպանդի հաջորդ օրը եթեր է հեռարձակել այնպիսի հաղորդում, որում խոսվում է Ռուսաստանում ապրող հայերի կողմից իրականացված հանցագործությունների մասին, և որում խիստ քննադատության են ենթարկվել հայերը:

Վերջում Անդրեյ Մալախովը այցելել է հիվանդանոցում կյանքի համար պայքարող 6 ամսական Սերյոժա Ավետիսյանին, իհարկե, նա չի կարողացել մտնել փոքրիկի հիվանդասենյակը, քանի որ, երեկվանից սկսած, դա արգելված է:

Ասում են՝ Մալախովը նկարահանումների ու զրույցների ընթացքում եղել է հուզված ու ցնցված:

Yerkir.am-ի հետ զրույցում Հայաստանի հանրային հեռուստաընկերության հաղորդավոր Էրիկ Անթառանյանը, ով դիմավորել եւ ճանապարհել է Մալախովին, ասաց, որ քիչ առաջ նրան տեղյակ է պահել փոքրիկի մահվան մասին: «Խոսափողից այն կողմ պարզապես լռություն էր»,-ասաց նա: 

Անթառանյանը նաեւ պատմեց, որ երբ Մալախովն այցելել է փոքրիկ Սերյոժային, նա, ըստ էության, որեւէ նկարահանում չի արել, պարզապես, անհանգստացած փոքրիկի առողջությամբ, զրուցել է նրան բուժող բժշկի, ՌԴ-ից ժամանած բժշկի, ինչպես նաեւ Առողջապահության նախարարի հետ եւ հայտնել օգնելու իր պատրաստակամության մասին: 

 
Նշենք նաեւ, որ դեռ հայտնի չէ, թե երբ եւ ինչ ձեւաչափով կհեռարձակվեն արդեն իսկ նկարահանած կադրերը եւ արդյոք դա կլինի «Թող խոսեն» հաղորդման շրջանակներում: