Ինչը տխրեցրեց Սփյուռքի նախարարին

Այսօր ՀՀ Սփյուռքի նախարար Հրանուշ Հակոբյանը տարեկան ամփոփիչ ասուլիսում նշեց, որ նախարարության 15 ծրագրերից որևէ մեկը չի ձախողվել, հակառակը` ընդլայնվել են: Նախարարությունը գործակցել է Սփյուռքի բոլոր 21 կառույցների հետ:

Տարվա դրական արդյունքներից էր Հայոց ցեղասպանության որոշումների ընդունումը Հունաստանի ու Բոլիվիայի կողմից, արքայազն Չարլզի այցելությունը հայկական համայնք:

«Մեր ծրագրերը կրկնապատկվում և եռապատկվում են: Կառանձնացնեի Սփյուռք ամառային դպրոցը, որտեղ վերապատրաստվում են մեր հայրենակիցները, սովորում մայրենի լեզուն»,- ասաց նախարարը:

Իրականացված միջոցառումներից էին «Իմ Հայաստան» երգի ու պարի համահայկական փառատոնը, որին մասնակցեց 1500 սփյուռքահայ աշխարհի բոլոր երկրներից, «Արի տուն» հայրենաճանաչության ծրագիրը, համաժողովներ, կլոր սեղան-քննարկումներ, Հայաստան-Սփյուռք հինգերորդ համաժողովը, որին մասնակցեց 1100 սփյուռքահայ աշխարհի տարբեր գաղթօջախներից, ինչպես նաև կազմակերպվեցին հայ կանանց, գրողների և լրագրողների համաժողովները, համահայկական մրցանակաբաշխություններ` Ռուսաստանի հայերի միության հետ համատեղ:

«Սփյուռքի նախարարությունում շրջանառվել է 63 312 գրությունը, և ես այդքանը կարդացել եմ, սիրելինե'րս»,- ասաց Հրանուշ Հակոբյանը` հարուցելով լրագրողների զարմանքը:

Լրագրողներից մեկը հարց ուղղեց նրան, թե ինչո՞ւ էր անտրամադիր մինչ ասուլիսը սկսվելը և ինչո՞ւ էր կոպիտ իր աշխատողների նկատմամբ: «Ձեր ընկերն ինձ վատ բան հիշեցրեց, ես տխրեցի, անձնական խնդիր էր, դա չպետք է ձեր աչքին դիպչի»,- պատասխանեց Հրանուշ Հակոբյանը: