Սեյրան Օհանյանը տեղյակ չէր ազատամարտիկների ծեծի դեպքերից

Այսօր լրագրողների հետ զրույցում պաշտպանության նախարար Սեյրան Օհանյանը պատասխանեց որոշ հարցերի:

Լրագրողները հետաքրքրվեցին, թե ի՞նչ նորություններ կան խոցված ուղղաթիռի փաստով հարուցված գործից: Սեյրան Օհանյանը պատասխանեց, որ դեռևս ընթանում է նախաքննություն, և տեղեկություններ չի կարող հայտնել:

Լրագրողները բարձրացրեցին նաև որոշ ազատամարտիկների անհայտ անձանց կողմից ծեծի ենթարկվելու փաստերը: Հիշեցնենք, որ օրեր առաջ ծեծի էին ենթարկվել Ապարանի եւ «Արաբո» ջոկատների հրամանատարները, իսկ երեկ` նաև ազատամարտիկ Սուրեն Սարգսյանը:

«Տեղյակ չեմ այդ դեպքերից, բայց գտնում եմ, որ ազատամարտիկներն առաջին հերթին իրենք պետք է օրինակ հանդիսանան մեր հասարակության մեջ, և եթե լինում են ոտնձգություններ ազատամարտիկների նկատմամբ, ես դա վատ եմ գնահատում»,- ասաց Սեյրան Օհանյանը` հավելելով, որ իրենց իրավասությունների սահմաններում կփորձեն պարզել այդ միջադեպերը: