Սեյրան Օհանյանը տեղյակ չէր, որ դատարանում լրատվամիջոցի շահերը պաշտպանելու է Միքայել Մինասյանի եղբայրը

Այսօր լրագրողները պաշտպանության նախարար Սեյրան Օհանյանից հետաքրքրվեցին նրա կնոջ վերաբերյալ հրապարակումների մասին: Նախարարը նախ նշեց, որ այդ հրապարակումները բացարձակապես իրականությանը չեն համապատասխանում, եւ իրենք դիմել են համապատասխան ատյաններին, այդ թվում` դատախազությանը, եւ գործը կամաց-կամաց բացահայտվում է:

«Ես նման դեպքերում զգացմունքներին չեմ տրվում: Ինչպեսեւ պատերազմում, ես սառնասիրտ եմ գործում եւ այս դեպքում էլ»,- ասաց նախարարը` հավելելով, որ տեղյակ չէ, որ դատարանում «Հրապարակ»-ի շահերը պետք է պաշտպանի Միքայել Մինասյանի եղբայրը:

Հարցին, թե հնարավո՞ր է, որ ինքը դառնա Սերժ Սարգսյանի իրավահաջորդը, Օհանյանը պատասխանեց, թե ինքը ներկայումս պաշտպանության նախարարն է, ու առաջարկեց ապրել այսօրվա իրականությամբ: «Ես ունեմ իմ տեղը, ես հպարտանում եմ, որ ՀՀ պաշտպանության նախարարն եմ, եւ իմ ուսերի վրա դրված է չափազանց մեծ պատասխանատվություն, պետք չէ այլ բաներ ասել»,- ասաց նախարարը: