Գործ ունենք նենգ ու որևէ պայմանավորվածություն չհարգող թշնամու հետ. փորձագետ

Ամեն տարի աշնանը հայկական զինված ուժերն Արցախում գումարտակային զորավարժություններ են անցկացնում։ Այս տարվա զորավարժություններն ավելի լայնածավալ էին, քան անցյալ տարվանը, բայց, այնուամենայնիվ, արտառոց չէին, երբ նոյեմբերի 12-ին ադրբեջանցիների կողմից խոցվեց Մի-24 ուղղաթիռը. Yerkir.am-ի հետ զրույցում ասաց ռազմական տեղեկատվության Razm.info կայքի համակարգող Կարեն Վրթանեսյանը:

Նրա խոսքով` տարիներ շարունակ անցկացվող զորավարժությունները ադրբեջանցիների համար նորություն չէին, թեև նախորդ տարիներին ադրբեջանցիները չեն փորձել խոցել հայկական ուղղաթիռներ, դա դեռևս երաշխիք չէր, որ հետագայում չէին փորձի նման ձևով հակամարտության սրման գնալ:

«Կարծում եմ` պետք է ավելի զգոն լինենք: Եթե մինչև այդ հակառակորդը ինչ-որ տիպի սադրանքի չի դիմել, որևէ երաշխիք չկա, որ հետո էլ չի դիմի: Այսինքն` միշտ պիտի զգոն լինենք ու հասկանանք, որ պատերազմը շարունակվում է, և գործ ունենք նենգ ու որևէ պայմանավորվածություն չհարգող թշնամու հետ»,- ասաց Կ. Վրթանեսյանը: