ՀՊՃՀ-ում «փշերի վրա» են` սպասում են Աշոտյանի խոստացած ուսումնասիրությանը

Արդեն տեղեկացրել ենք, որ ԿԳ նախարար Արմեն Աշոտյանը խոստացել էր ԿԳՆ-ի լիազորությունների շրջանակում ուսումնասիրել` ինչ է կատարվում ՀՊՃՀ-ում:

Yerkir.am-ի հետ զրույցում ՀՊՃՀ տեղեկատվական և հեռահաղորդակցական տեխնոլոգիաների վարչության նախկին պետ Վլադիմիր Խոեցյանը նշեց, որ իր` աշխատանքից հեռացումից հետո բուհի անվտանգության աշխատակիցներն իրեն այլեւս ներս չեն թողնում:

«Օրերս գնացի բուհի մոտ, հանդիպեցի իմ խմբի աշխատակիցների հետ: Իրավիճակը բուհում նույնն է, ոչինչ չի փոխվել: Այնպիսի տպավորություն է, որ բոլորը սպասում են նախարարի այցին»,- ասաց Խոեցյանը:

Հիշեցնենք, որ Խոեցյանի փոխարեն նշանակվել է նրա տեղակալը` Վահե Կիրակոսյանը: Խոեցյանը տեղեկացրեց նաև, որ Կիրակոսյանը հավաստիացնում է, թե աշխատակազմի նորանշանակ ղեկավարը` Սամսոն Զատիկյանը, ի տարբերություն նախկինի, կարծես հիմա այնքան էլ չի շփվում իրենց բաժնի հետ:

«Վահեն ասում է, որ շատ եզակի դեպքերում են տեսնվում Զատիկյանի հետ, այնպիսի տպավորություն է` կարծես խուսափի իր հետ հանդիպել: Կարծում եմ` ուղղակի հող են նախապատրաստում Վահեին էլ աշխատանքից հանելու համար»,- ասաց Խոեցյանը:

Ի դեպ, Խոեցյանն առաջիկայում պատրաստվում է դիմել դատարան` իրեն աշխատանքից անհիմն ազատելու հետ կապված բողոքով: Նա նշեց, որ հայցադիմումը փաստաբանի մոտ է, ինչ-ինչ շտկումներ պետք է արվեն, և մինչև շաբաթվա վերջը կդիմեն դատարան: