Ինջիղուլյանը հիվանդանոցային հրատապ բուժման կարիք չունի

Արդեն տեղեկացրել ենք, որ ադրբեջանական գերությունից Հայաստան վերադարձած` 23-ամյա զինծառայող Հակոբ Ինջիղուլյանը հետազոտվում է Նորքի «Սուրբ Գրիգոր Լուսավորիչ» բժշկական կենտրոնում:

Yerkir.am-ի հետ զրույցում ՀՀ ԱՆ մամլո ծառայությունից տեղեկացրին, որ Ինջիղուլյանի առողջական վիճակի գնահատման նպատակով հիվանդանոցում կազմակերպվել է համալիր մասնագիտական կոնսիլիում: Պրոֆեսորներից կազմված մասնագետների խումբը` նյարդաբան, սրտաբան, վիրաբույժ, ակնաբույժ, ուռոլոգ, թերապևտ /ընդհանուր առմամբ` 15 բժիշկ/ կատարել է խորհրդատվություն և զննություն:

Ինջիղուլյանն անցել է կլինիկական և գործիքային բոլոր հետազոտությունները: Մասնագետների գնահատմամբ` նրա մոտ այս պահին հիվանդանոցային հրատապ բուժման անհրաժեշտություն չկա, թեեւ հայտնաբերվել են մի շարք հիվանդություններ: Սակայն Ինջիղուլյանին ասվել է, որ նրա ցանկության դեպքում հիվանդանոցը պատրաստ է համապատասխան բուժում կազմակերպել: