Հակոբ Ինջիղուլյանը ցանկանում է Հայաստան վերադառնալ

Վերջերս Ադրբեջանի գերությունից փրկված և երրորդ երկիր տեղափոխված Հակոբ Ինջիղուլյանն իրեն լավ է զգում. Yerkir.am-ին հայտնեց Հակոբի եղբայրը` Հարություն Ինջիղուլյանը:

«Երեկ ենք «Սկայփ»-ով խոսել նրա հետ, ամեն ինչ նորմալ է: Դեռևս ոչնչով չի զբաղվում»,-  հայտնեց Հարությունը, նաև նշեց, որ երեկվա զրույցի ժամանակ նույնիսկ տեսել են Հակոբին: Մինչ այս զրուցելիս են եղել առանց վեբ-տեսախցիկի:

Հարությունի խոսքով` Հակոբը Հայաստան գալ ցանկանում է, սակայն դեռևս չի հասել այդ երրորդ երկիրը, որը նրան ապաստան է տալու: Եվ միայն այնտեղ հասնելուց հետո պարզ կլինի, թե ինչ պայմաններով է այդ պետությունն իրեն ընդունելու, և արդյո՞ք Հակոբը կկարողանա Հայաստան վերադառնալ, ու դա ե՞րբ հնարավոր կլինի:

Իսկ ինչ վերաբերում է գտնվելու վայրին, Հարությունը նշեց, թե, իրենց տեղեկություններով, Հակոբը Եվրոպայի տարածքում չէ: