Քանի՞ տարի «դրած» հայհոյում եք այս երկրին ու ժողովրդին

ԱԺ ՀՀԿ խմբակցության քարտուղար Վահրամ Բաղդասարյանը ընդդիմադիրներից մեկի կողմից հանրահավաքներից մեկի ժամանակ իշխանություններին հայհոյելու փաստից ծայրահեղ վրդովված է և իր ցասումն է արտահայտում «երկրի առաջին դեմքերին» (առաջին հերթին՝ բնականաբար) հայհոյելու կապակցությամբ:

Վ. Բաղդասարյանին, անշուշտ, ամենևին չի հուզում հարցը, թե ինչու՛ է այնքան լցվել մարդկանց համբերության բաժակը, որ իրեն թույլ են տալիս հայհոյել, այն էլ՝ հրապարակավ: Արամ Մանուկյանը, անշուշտ, ո՛չ Շմայս է, ո՛չ Բուռնաշ, ո՛չ էլ գեներալ Մանվել, բայց երբ նա է արդեն սկսել հայհոյել, ուրեմն գուցե արժե՞ ականջ կախել այդ հայհոյանքին. չէ՞ որ երբ հայհոյել է սկսում ինտելեկտի ու կրթվածության որոշակի մակարդակ ունեցող պատգամավորը, ուրեմն մի բան, մի շատ կարևոր բան այլևս իր տեղում չէ:

Այդ շատ կարևոր բանը, Վ. Բաղդասարյանի և նրա նման հավատավոր ՀՀԿ-ականների կարծիքով, իբր իշխանությունն է, մանավանդ` «առաջին դեմքերը», բայց գոնե տնտեսագիտության դոկտորը պիտի հասկանար, որ Ա. Մանուկյանի և նրա նման տասնյակհազարավորների հայհոյանքն ուղղված է այս իշխանությունների վարած այնպիսի քաղաքականությանը, որի «արդյունքում» մարդիկ փախչում են երկրից այնպես, ինչպես ՀՀԿ-ականները` ահավասիկ, ընդդիմության հայհոյանքից:

Տնտեսագիտության դոկտորը, որ հուզիչ կերպով նրբազգաց է իր կուսակիցների հասցեին հնչող հայհոյանքների նկատմամբ, դժվար թե չգիտի կամ չի տեսնում, որ իշխանություններին և նրա «առաջին դեմքերին» հայհոյում են առաջին հերթին իր երկրի քաղաքացիները և հայհոյում են՝ լքելով այն. իշխանություններին «հայհոյում» են խորացող աղքատությունն ու անտերունչի այն թշվառ վիճակը, որ ապրում է այս երկրի յուրաքանչյուր գործազուրկ քաղաքացի:

Այո, այդ նրա՛նք են հայհոյում, իսկ Արամ Մանուկյանն ընդամենն այդ հայհոյանքը հնչեցնում է:

«Ի՞նչ է, մտածում եք` մեր ուժը չէ՞ր հերիքում, որ հարթակից երկրի առաջին դեմքերին հայհոյող, ալկոհոլ օգտագործած մարդկանց և՛ անձնապես հայհոյենք, և՛ խոսափողով հայհոյենք, բայց մենք չենք իջնի այդ մակարդակին»,- ԱԺ ավանդական ճեպազրույցում հայտարարել է ԱԺ ՀՀԿ խմբակցության կրթյալ ղեկավարը:

Հանգստացնենք պարոնին. ոչ ոք, այս երկրի նույնիսկ մանկահասակ քաղաքացին որևէ կասկած չունի ձեր` հայհոյելու ունակության վերաբերմամբ, այդ ոլորտում դուք ուղղակի նմանը չունեք «տարածաշրջանում», դուք ավելի քան մեկուկես տասնամյակ «դրած» հայհոյում եք այս երկրին ու ժողովրդին այնպես բիրտ ու անկիրթ:

Բ. Գասպարյան