«Ֆեյսբուք»-ում 5 տարի առաջ դրած երկու «լայքի» համար Թուրքիայում քաղաքացի է ազատազրկվել

Դիարբեքիրի  ծանր հանցագործությունների 11-րդ դատարանը Ազիզ Թուրայ անունով քաղաքացու, որը 4 և 5 տարի առաջ «Ֆեյսբուք» սոցիալական ցանցում հավանել էր երկու նկար, «ահաբեկչական քարոզչություն անելու» մեղադրանքով դատապարտել է 1 տարի 7 ամիս ազատազրկման: Դատարանը միևնույն քաղաքացու` Թուրքիայի կողմից Աֆրինում իրականացված գործողությունների դեմ հրապարակման մեջ ոչ մի հանցավոր տարր չի հայտնաբերել. հայտնում է diken.com.tr կայքը:

Թուրայի փաստաբանը նշել է, որ ոչ մի ժողովրդավարական համակարգում ֆեյսբուքյան գրառումը հավանելը հանցանք չի համարվում: «Դատարանը, քարոզչության մեղադրանքով, օրենքով նախատեսված չափորոշիչների չհամապատասխանող որոշումներ կայացնելով, քաղաքացիներին հիմարեցնում է»,- ասել է նա:

Նշենք, որ անցած տարի Թուրայը կայքում նյութ էր հրապարակել Աֆրինի գործողության վերաբերյալ, և դատարանը հետաքննություն էր սկսել: