ՔԿԱԳ-ի միջոցով ամուսնությունը ռեստորանում գրանցելը ընդունելի՞ է, թե՞ ոչ

Արդյո՞ք ընդունելի է, որ ամուսնությունները գրանցելու համար ՔԿԱԳ աշխատակցին հրավիրում են ռեստորան: Այս հարցն այսօր բարձրացրեց Արտաշատ քաղաքի ՔԿԱԳ բաժնի պետը արդարադատության նախարար Հովհաննես Մանուկյանի հետ հանդիպման ժամանակ: «Եթե գնում են եկեղեցի, ապա կարող են նաև մեզ մոտ գալ»,- ասաց նա:

Մինչ հարցին պատասխանելը նախարարը խոսքը տվեց ՔԿԱԳ գործակալության պետ Արգամ Ստեփանյանին: Նա ասաց, որ ուսումնասիրել է միջազգային փորձը, դա պետության կողմից տրվող վճարովի ծառայություն է, որն ընդունված է շատ երկրներում: Եվ այս դեպքում տուրքը եռապատիկ անգամ ավելի բարձր է, քան հենց ՔԿԱԳ գրասենյակում կատարելու դեպքում:

Նախարար Հ. Մանուկյանն էլ ասաց, որ այս պահին խոսել դրանից, այնքան էլ նպատակահարմար չէ, քանի որ ՔԿԱԳ մարմինները չունեն նորմալ կահավորված հանդիսությունների սրահներ: Սակայն նման սրահներ, նախարարի խոսքով, չկան նույնիսկ Երևանում:

Իսկ Արգամ Ստեփանյանն ավելացրեց, որ Քանաքեռում ժամանակավորապես նման սրահ տրված է եղել ՔԿԱԳ մարմնին, և փորձը ցույց է տվել, որ նորմալ կահավորված սրահ ունենալու դեպքում քաղաքացիները նախընտրում են այնտեղ գրանցել ամուսնությունը, քան ՔԿԱԳ աշխատակցին հրավիրել ռեստորան: