ՔԿԱԳ աշխատակիցների աշխատավարձերը բարձրացվել են

«Մեր վիճակն աղետալի է: Մենք ուզում ենք հետ գալ արդարադատության նախարարություն»,- այսօր արդարադատության նախարարի հետ հանդիպման ժամանակ ՔԿԱԳ մարմնի աշխատակիցներից մեկը դժգոհություն հայտնեց, որ ՏԻՄ ենթակայության տակ գտնվում են ձևականորեն և իրենց հարցերն իրականում չեն լուծվում:

Նա նախարարին հայտնեց, որ նախևառաջ նորմալ գրասենյակային պայմաններ չունեն, իրենց ուժերով հնարավորինս վերանորոգում են, սակայն վիճակը շարունակում է անմխիթար մնալ, իսկ իրենց խնդիրներին լուծում չեն տալիս:

Ի պատասխան, նախարար Հովհաննես Մանուկյանն ասաց, որ ինքը հակված չէ խնդրի լուծման այդ տարբերակին, և պետք է միասին այլ տարբերակներ քննարկեն:

Նա նշեց, որ համայնքն ունի որոշակի պարտավորություններ` նրանց համապատասխան աշխատանքային պայմաններով ապահովելու համար: Եվ եթե ՏԻ մարմնին վերապահված գործառույթներն արդյունավետ չեն իրականացվում, ապա պետության կողմից պետք է ուժեղացվի վերահսկողությունը:

Նախարարը հայտնեց նաև, որ այս ոլորտի բաժնի պետերի աշխատավարձերը բարձրացվել են` նախկին 126 հազարի փոխարեն ստանալու են 256 հազար դրամ: Եվ եթե տեղյակ չեն, ապա պետք է հետամուտ լինել, որ համապատասխան ՏԻ մարմինները վերանայեն աշխատավարձերի չափը: