Մենք մեր անվան համար չենք խաղում, այլ` ազգի. Հենրիխ Մխիթարյան

 Ավանի ակադեմիայում բաց մարզում անցկացնելուց հետո  լրագրողների հետ զրույցում  Հայաստանի ազգային հավաքականի և Դորտմունդի «Բորուսիա»-ի  կիսապաշտպան Հենրիխ Մխիթարյանը խոսեց հավաքականի  առաջիկա հանդիպումների  մասին:

 «Շատ լավ ժամանեցի: Հոգնածություն արդեն չկա: Ճիշտ է, տանը հաղթանակներ չենք տոնել.  երեք հաղթանակ ունենք, երեքն էլ՝ արտագնա խաղերում, բայց, կարծում եմ, որ ոչինչ չի պատահել, դեռ ունենք Բուլղարիայի հետ հանդիպումը: Պետք է անենք ամեն ինչ, որ հաղթենք: Շատ կարևոր խաղեր են մեզ սպասում: Լրջորեն ենք տրամադրված, անելու ենք ամեն ինչ, որպեսզի առավելագույն արդյունքի հասնենք:

Այս շրջանում գրեթե բոլոր խաղերն էլ կորուստներով ենք խաղացել, երևի մեկ կամ երկու խաղ ենք առանց կորուստների անցկացրել: Կարող եմ ասել, որ ունենք հավաքականի մարզիչ, ով կարողանում է լուծել այդ խնդիրը:

Բուլղարիան լավ թիմ է, չեմ ցանկանում առանձնացնել ոչ մեկի: Ավելի կարևոր է կենտրոնանալ հավաքականի խաղի վրա: Շատ հետաքրքիր հանդիպում է սպասվում»:

Անդրադառնալով Չեխիա-Հայաստան հանդիպումից հետո իր  արած արտահայտությանը («Այս հաղթանակով մենք բոլորի բերանը փակեցինք»)` Մխիթարյանն ասաց. «Շատ մարդկանց նկատի ունեի: Այն մարդկանց, ովքեր կարծում էին, թե հավաքականը անկում է ապրել, և այն հաղթանակները պատահական էին մեզ տրվել: Կարծում եմ, որ նրանք նման արտահայտություն անելու իրավունք չունեն: Մենք մի ազգ ենք ներկայացնում և խաղում ենք ոչ միայն մեզ համար, այլ մեր ազգի համար, այն մարդկանց համար, ովքեր ծնվել են Հայաստանում, ապրում են Հայաստանում և ներկայացնում են Հայաստանը: Մենք չենք հաղթում, որ մեր անունը բարձրանա»:

Հիշեցնենք, որ ֆուտբոլի Հայաստանի  ազգային հավաքականը  Աշխարհի 2014թ. առաջնության ընտրական փուլի շրջանակներումԲուլղարիայի դեմ կայանալիք հանդիպումից առաջ այսօր բաց մարզում անցկացրեց Ավանի Ֆուտբոլի ակադեմիայում: