Պուտինը խաղում է պոկեր, երբ մյուսները խաղում են շախմատ. Գարի Կասպարով

Շախմատի աշխարհի նախկին չեմպիոն, այժմ ՌԴ ընդդիմադիր քաղաքական գործիչ Գարի Կասպարովը համարում է, որ ՌԴ նախագահ Վլադիմիր Պուտինն «ամենավտանգավոր մարդն է աշխարհում» և ԱՄՆ-ի համար ավելի մեծ վտանգ է ներկայացնում, քան «Իսլամական պետություն» ահաբեկչական խմբավորումը։ Այդ մասին Կասպարովն ասել է Yahoo News-ին տված հարցազրույցում. հայտնում է Deutsche Welle-ի ռուսական ծառայությունը։

Կասպարովը նաև  խստորեն քննադատել է ինչպես ԱՄՆ նախագահ Բարաք Օբամային, այնպես էլ եվրոպացի քաղաքական գործիչներին։ Նրա կարծիքով՝ ամերիկացի առաջնորդը չափազանց ուշ է արձագանքել Պուտինի ագրեսիային Ուկրաինայում, ինչը հանգեցրել է Ղրիմի անեքսիային։

Նա նաև անհանգստություն է հայտնել, որ Պուտինը կարող է օգտագործել ցուրտ ձմեռը և դեպի Եվրոպա գազամատակարարումը դադարեցնելու սպառնալիքները՝ որպես պատժամիջոցները մեղմելու լծակ։

«Նա խաղում է պոկեր, երբ մյուսները խաղում են շախմատ»,- ասել է Կասպարովը։