Հայաստանը մերժել է Երևանում նամազ անելու` թուրքերի պահանջը. թուրքերն ու ադրբեջանցիները կատաղած են

Արդեն հայտնել ենք, որ, մատնանշելով Վանի Աղթամար կղզու Սբ Խաչ եկեղեցում տարին մեկ անգամ մատուցվող պատարագը, թուրքական ASİMDER (Հայկական անհիմն պնդումների դեմ պայքարի) միությունը դիմում էր ներկայացրել Հայաստանում Թեհրանի և Վրաստանի դեսպանատներին՝ Երևանի մզկիթում ուրբաթ օրվա նամազ անելու պահանջով:

Ըստ Haberler-ի՝ Հայաստանը մերժել է թուրքերի պահանջը:

Այս որոշումից խիստ վրդովված` հակահայ միության նախագահ Գյուքսել Գյուլբեյը ասել է. «Մենք նման պահանջով դիմում ներկայացրեցինք, և նրանք մերժեցին: Իսկ իրենք, երբ ուզում, գալիս են մեր երկիր և պատարագ անում: Նրանք մեզ չեն ընդունում, մեղմ ասած՝ «մի' եկեք մեր երկիր» ասելով : Մենք չենք հասկանում նաև, թե ինչու է հայերի պատրիարքի փոխանորդ Արամ Աթեշյանը այս հարցի վերաբերյալ լռում: Մենք մեր պահանջը դարձյալ ներկայացնելու ենք: Մինչև չհասնենք մեր պապերի` աքսորված այդ հողերին՝ ոչ ոք մեզ հետ չի պահելու մեր ընտրած ճանապարհից»:

Հույս ունենալով, որ Հայաստանը կկատարի նրանց պահանջը, նամազի կատարման համար հատուկ խմբին միանալու նպատակով Ադրբեջանից Թուրքիա է ժամանել «Beynelxalq» սփյուռքի կենտրոնի քարտուղար Սամիր Ադըգյոզելլին, ով, իր հերթին, երազային հայտարարություններով է հանդես եկել:

«Ռեւանը մեր երազանքն է, սակայն այժմ Ադրբեջանի պատմական հողերը գտնվում են Հայաստանի տիրապետության տակ: Մեր կենտրոնը միշտ օժանադակել է ASİMDER միությանը: Մենք՝ Ռեւանի թոռներս, վերջիվերջո, հասնելու ենք մեր պապերի գերեզմաններին, այցելելու ենք նրանց տներն ու ամեն տարի անելու ենք մեր ուրբաթ օրվա նամազը: Այցելելու ենք Հայաստանի ԶՈՒ կողմից բռնագրավված Ղարաբաղի մզկիթներն ու հուշարձանները: Այդ հողերը մերն են« և պատմությունը հերքելով` չի մոռացվում»,-ասել է ադրբեջանցին: