Ո՞վ է ավելի խոցելի. ԱԺ նստաշրջանը սկսվեց փոխադարձ ակնարկներով

Մեկնարկեցին հինգերորդ գումարման ԱԺ վեցերորդ նստաշրջանի աշխատանքները: ԱԺ նախագահ Գալուստ Սահակյանն իր ելույթում ներկայացրեց նստաշրջանի օրակարգը:

ԱԺ նախագահին հարց ուներ երկար բացակայությունից հետո իր պատգամավորական գործունեությանը վերադարձած` «Ժառանգություն» խմբակցության պատգամավոր Զարուհի Փոստանջյանը: «Իհարկե, ես բացակայել եմ, բայց ոչինչ չի փոխվել իմ բացակայության ընթացքում: Ցանկանում եմ հարց ուղղել խոցելի մեծամասնությանը, թե ե՞րբ են օրակարգից հանվելու հայ-թուրքական խայտառակ արձանագրությունները»,- հետաքրքվեց նա:

Գալուստ Սահակյանն էլ պատասխանեց. «Խոցելի փոքրամասնությանն ասեմ, որ հարցը համարում եմ հռետորական, որովհետև բազմիցս տրվել են պարզաբանումներ»:

Նշենք, որ Ազգային ժողովի նոր նստաշրջանի առաջին օրը ներկա էր 123 պատգամավոր: Երկու օր առաջ ՀՀԿ Խորհրդի նիստում ՀՀ նախագահ Սերժ Սարգսյանը հորդորել էր ՀՀԿ պատգամավորներին` ակտիվ աշխատել օրենսդիր մարմնում եւ անթույլատրելի էր համարել պատգամավորների բացակայությունները: