Դիլիջան. աղբի մեջ էր լճափը

Եթե նախորդ տարի դիլիջանյան հանգստի ժամանակ աչքի էր զարնվում ոչ կենտրոնական փողոցների անխնամ վիճակը, ապա այս տարի, որքան էլ ցավալի է, բառի բուն իմաստով, աղբի մեջ էր լճափը:

Դիլիջան մտնողին առաջինը դիմավորում է արհեստական գողտրիկ լիճը, որի ջուրը մամռակալած էր: Թեև ազնվության համար պիտի նշենք, որ արհեստական սպիտակ կարապներ էին տեղադրել, սիրուն ներկել: Լճի եզրերին բազրիքներ էին ավելացրել, որոնք նույնպես խնամքով ներկված էին: Լճի շուրջբոլորը նոր նստարաններ էին տեղադրված` «Դիլիջան» մակագրությամբ: Այո, նստարանները նոր էին, բայց դրանց նոր ու հին լինելն իրականում եղանակ չէր փոխում, քանի որ դրանց տակն ու շուրջբոլորը անասելի քանակությամբ աղբ էր լցված:

Եվ այսքանից հետո խոսում ենք զբոսաշրջության զարգացման մասին...