ԿԱՊԻՏԱԼ. Ինչ անել աղբի հետ

Գերմանական «Բեքեր» ընկերությունը Երեւանում ուսումնասիրություններ է իրականացրել աղբահանության արդյունավետ կազմակերպման ուղղությամբ: Երեւանի քաղաքապետարանի տարածած հաղորդագրության համաձայն՝ ընկերության ներկայացուցիչները հանդիպել են Երեւանի քաղաքապետ Կարեն Կարապետյանին եւ վերջինիս ներկայացրել իրենց ուսումնասիրությունների արդյունքները: Այցի շրջանակում գերմանական ընկերության ներկայացուցիչները ծանոթացել են Էրեբունի եւ Կենտրոն վարչական շրջանների սանմաքրման ընկերությունների աշխատանքին, ինչպես նաեւ այցելել Նուբարաշենի աղբավայր:

Երեւանի քաղաքապետն ընդգծել է ընկերության կողմից իրականացված ուսումնասիրությունների կարեւորությունը: «Երեւանի աղբահանության կազմակերպման ամբողջական պատկերի մասով մեզ հատկապես անհրաժեշտ է ունենալ իրական գնահատական: Դա թույլ կտա ավելի հիմնավոր եւ արդարացված առաջարկներ ակնկալել ինչպես բազմաբնակարան շենքերում աղբահանության աշխատանքների կազմակերպման, այնպես էլ ժամանակակից աղբամանների տեղադրման առումով»,- նշել է Կարեն Կարապետյանը:

«Բեքեր» ընկերության ներկայացուցիչները հավաստիացրել են, որ կշարունակեն ուսումնասիրությունները մայրաքաղաքում եւ ամփոփ կներկայացնեն Երեւանում աղբահանությունն արդյունավետ կազմակերպելու առաջարկները: