Սեյրան Օհանյանը դրական է վերաբերվում ընդդիմադիրների նախաձեռնությանը

ՀՀ պաշտպանության նախարար Սեյրան Օհանյանը դրական է վերաբերվում սահմանամերձ համայնքներին արտոնություններ շնորհելու գաղափարին:

«Ես միշտ էլ լավ եմ վերաբերվել այն մտքին, որ այն բնակավայրերը, որոնք գտնվում են հակառակորդի կրակահերթի տակ, ունենան համապատասխան արտոնություններ»,- Yerkir.am-ի հետ զրույցում ասաց նախարարը:

Հիշեցնենք, որ ԱԺ ՀՅԴ և ԲՀԿ խմբակցության պատգամավորները, օգոստոս ամսին այցելելով սահմանամերձ համայնքներ և տեղում  ծանոթանալով առկա խնդիրներին, որոշել են մշակել օրինագիծ սահմանամերձ համայնքներին հատուկ` «սահմանապահ»  կարգավիճակ տալու մասին, այսինքն` պետք է սահմանվի «սահմանապահ համայնք» հասկացությունը, որը կենթադրի մի շարք արտոնություններ տվյալ համայնքի բնակիչների համար: Նաև ընդդիմադիր պատգամավոր Նիկոլ Փաշինյանն է հանդես եկել նման օրինագծով:

Սեյրան Օհանյանի խոսքով` սահմանամերձ համայնքներին արտոնություններ տալու հետ կապված` վարչապետի ցուցումով քննարկումներ են ընթանում: Նախորդ տարիներին կառավարությունը  մի քանի արտոնություններ արդեն սահմանել է: Պաշտպանության  նախարարությունը ևս  առաջարկություններ է ներկայացրել այդ կապակցությամբ, և բոլոր առաջարկությունները աշխատանքային խմբի կողմից կքննարկվեն, ու կկայացվեն համապատասխան որոշումներ: