Էրդողանը պնդում է՝ Ռուսաստանը դրական է վերաբերվում Թուրքիայի կողմից Սիրիայի Քոբանի քաղաքն ազատագրելու գաղափարին

Ռուսաստանը դրական է վերաբերվում Թուրքիայի կողմից Սիրիայի Քոբանի քաղաքն ազատագրելու գաղափարին. մամուլի ասուլիսում այսօր հայտարարել է Թուրքիայի նախագահ Ռեջեփ Էրդողանը. հաղորդում է ՏԱՍՍ-ը:

«Տարբեր խոսակցություններ են պտտվում, սակայն մենք կարծում ենք, որ Քոբանիի հետ կապված խնդիրներ չեն լինի: Ռուսաստանը դրական է վերաբերվում այդ հարցին»,- պարզաբանել է Թուրքիայի նախագահը:

Նա նաև հավելել է, որ «Թուրքիայի զինված ուժերը, այսպես կոչված, սիրիական ազատագրական բանակի զինյալների համար կապահովեն անվտանգ մուտք Մանբիջ քաղաք, որը գտնվում է «Սիրիայի ժողովրդավարական ուժեր» կոալիցիայի վերահսկողության տակ»:

«Մանբիջի հարցով մենք համաձայնագիր ունեինք ԱՄՆ-ի հետ, ըստ որի՝ 90 օրվա ընթացքում  ահաբեկիչները պետք է դուրս բերվեին: Այժմ մենք իրականացնում ենք մեր սեփական որոշումը. Մանբիջը պետք է ազատագրվի գրոհայիններից: Այնտեղ կլինեն Մանբիջի իրական տերերը, այսինքն՝ մեր արաբ եղբայրները: Մենք կփորձենք ապահովել նրանց անվտանգությունը»,- նշել է Թուրքիայի նախագահը:

Էրդողանի խոսքով՝ Անկարան դրական է գնահատում ԱՄՆ-ի որոշումը Սիրիայի հարավ զորքերի տեղափոխման վերաբերյալ: «ԱՄՆ-ը հավատարիմ է մնում զորքերը դուրս բերելու իր դիրքորոշմանը: Մենք կարծում ենք, որ դա դրական քայլ է»,- եզրափակել է նա: