Ինձ հավատացնում էին, որ հայրս մահացել է. ցուցմունք է տալիս Շանթ Հարությունյանի որդին

Կենտրոն և Նորք-Մարաշ վարչական շրջանների ընդհանուր իրավասության դատարանում այսօր մեկնարկեց նախորդ տարվա նոյեմբերի 5 –ին Երևանի Կենտրոնում տեղի ունեցած անկարգությունների գործով ամբաստանյալների հարցաքննությունը: Առաջինը ցուցմունք տվեց Շանթ Հարությունյանի որդին` Շահեն Հարությունյանը:

Վերջինս պատմեց Ազատության հրապարակում անցկացվող նստացույցի և դրան հաջորդող երթի մասին: Նրա խոսքով` երթը խաղաղ բնույթ էր կրում , սակայն մեկնարկից հետո խառնաշփոթ իրավիճակ է ստեղծվել:

«Մի քանի հոգով հորս գցել էին գետնին և ոտքերով խփում էին: Տեսել եմ հորս խփել են` ես էլ նրանց եմ խփել, որից հետո մի քանի հոգով վազեցին հետևիցս` գցեցին գետնին, խփեցին»,- ասաց նա և պատմեց, որ ոստիկանական մեքենայի մեջ գողացել են իր մոտ եղած ֆոտոխցիկն ու գումարը:

«Բաժնում ինձ հավատացնում էին, որ հայրս ու իր ընկերները մահացել են, իսկ մի քանին էլ վերակենդանացման բաժանմունքում են , այնպես էին խոսքում, որ ես լսեի, բայց ես չէի հավատում»:

Շանթ Հարությունյանը դիմելով որդուն` հարցրեց, արդյոք հիշում է , թե ինչ են խոսել դեպքի նախորդ օրն Ազատության հրապարակում:

«Դու ասացիր, որ եթե ուզում ենք արժանապատիվ ապրել պետք է մինչև վերջ պայքարենք, պայմանավորվեցինք, որ ինչ լինի իրար հետ ենք լինելու»,-պատասխանեց Շահենը: Այս պահին ցուցմունք է տալիս Շանթ Հարությունյանը: