Ընդամենը աչքերս են մրմռացել. ցուցմունք տվեց Շանթ Հարությունյանի գործով տուժող փոխգնդապետը

Նախորդ տարվա նոյեմբերի 5-ին Երեւանի կենտրոնում տեղի ունեցած անկարգությունների գործով այսօր դատարանում ցուցմունք տվեց առաջին տուժողը` գնդի հրամանատար, փոխգնդապետ Անդրանիկ Առաքելյանը:

Նա պատմեց Շանթ Հարությունյանի կազմակերպած երթի մասին` նշելով, որ իրենք նպատակ չեն ունեցել երթը ցրելու, պարզապես հասարակական կարգն են պահպանել: Առաքելյանը նշեց, որ երթի մասնակիցներից իր մոտ տպավորվել է սպիտակ սպորտային համազգեստով քաղաքացին:

Փաստաբան Կարեն Քալանթարյանի հարցին, թե այդ երիտասարդը կոնկրետ ի՞նչ գործողություններ էր կատարում, տուժողը պատասխանեց, որ պայթուցիկներ էին նետում փողոցի երթևեկելի մաս, և որ այդ պայթուցիկների ծխից իր աչքերը մրմռացել են: Պաշտպան Արա Զաքարյանի հարցին, թե երթի մասնակիցների՝ փողոց դուրս գալուց առաջ նրանց բարձրախոսով ինչ-որ բան զգուշացվե՞լ է, հարցաքննվողը պատասխանեց՝ ոչ, եւ պատճառաբանեց, որ դրա կարիքը չկար:

Ամբաստանյալ Շանթ Հարությունյանն էլ, օրինակ բերելով սովետական մանկապարտեզում և դպրոցում երեխաների խմբերի կողմից դրոշակ պահելով ճանապարհը հատելու օրինակը, հետաքրքրվեց` արդյո՞ք ցանկացած խումբ կարող է ճանապարհն անցնելիս դրոշակ պարզել և անցնել, արդյո՞ք նման կարգ կա:

Ոստիկանը պատասխանեց, որ եթե մոտակայքում կա հետիոտնի համար նախատեսված անցում, քաղաքացիները պարտավոր են օգտվել այդ անցումից: Այդ առնչությամբ Շանթը հայտարարեց , որ իրենք փորձել են խուսափել պրովոկացիայից, դրա համար էլ մայթից դուրս են եկել փողոց:

«Մարմնական վնասվածք չեմ ստացել, շորերս չեն պատռվել, ընդամենը աչքերս են մրմռացել»,- ասաց նա:

Հարցաքննության ավարտին ամբաստանյալ Ալեք Պողոսյանն էլ տուժողից հետաքրքրվեց` արդյո՞ք նա կցանկանար ավելի լավ Հայաստանում ապրել, սակայն դատավորը հանեց հարցը` նշելով, որ դա գործի հետ կապ չունի:

Այսօրվա դատական նիստը հետաձգվեց Շանթ և Շահեն Հարությունյանների պաշտպան Ինեսա Պետրոսյանի խնդրանքով: Նա դատարանին հայտնեց, որ Շահեն Հարությունյանն իրեն վատ է զգում և չի կարող մասնակցել հարցաքննությանը: Հաջորդ դատական նիստը նշանակվեց հուլիսի 16-ին: Այդ օրը պետք է ցուցմունք տա այս գործով «գլխավոր» տուժող Գեղամ Խաչատրյանը: